Thursday, August 5, 2010

Monday, May 10, 2010

اسرقني ..... شكراً


عني و عن جميع المفقوعين اتقدم بالشكرو التقدير لكل العاملين بمطبعة البنكنوت بالبنك المركزي و اخص بالشكر السارق القنوع اللي سرق هذا المبلغ التافة 2 مليون و 800 ألف جنيه مصري لا غير اللي ميشتروش شقة متشطبة في التجمع و حتى الان لم يهربهم لسويسرا غير انه مخدش بيهم قرض زي ناس و لا خد رشوة و لا حاجة دة سرق بمجهوده بدون الاعتماد على أي حد او أي قوى خارجية
طبعا كلنا عارفين ان المطبعة اتسرقت
مطبعة مين يا ولاد
مطبعة البنك المركزي !!!! مش مطبعة ام عبده اللي على ايدك اليمين و انت داخل بركة
الفيل اللي بتطبع قراطيس اللب
ازاي اتسرقت محدش عارف اهو بيقولك كان فيه كرتونتين فلوس و في اليوم دة كانوا الموظفين متفقين يعملوا عزومة عشان مكنوش موجودين في شم النسيم فجابوا كرتونيتن بيض و لأن خزنة الفلوس في البنك 28م يعني قد التلاجة الايديال 10 قدم قوم الكراتين دخلوا في بعض و كلوا الفلوس بدل البيض
ليه بقى و مش حاسين بطعم الفلوس
لا مش حاسين هما يعني بيشوفوا الفلوس فين دة مرتبهم من الصراف للايجار و الكهربا و العيال و الضرايب عدل
طب هو مش فيه كاميرات مراقبة في البنك دة عمر افندي مليان كاميرات
ايون طبعاً فيه خمس كاميرات بس عقبال امالتكم كدة عطلانين من سنة مفيش غير واحدة شغالة
و ياعيني عشان هي بس اللي شغالة مصورتش الحرامي
دة غير انها كاميرا متمردة مكنتش عايزة تشتغل في المطبعة و كانت عايزة تشتغل في الفيديو كليب
فطبعا كاميرا بالاخلاق دي مش حتعرف تصور حرامية و ناس وحشين كدة
و دة سبب تاني يخلينا نشكر الحرامي و نرفع ليه القبعة لانه فضل ماسك نفسه سنة بحالها و صابر صابر و اداهم فرصة طويلة المدى عشان يصلحوا الكاميرات او يغيروها و لما يأس قال مبدهاش بقى انا اخد الفلوس دي عشان اصلح بيها الكاميرات
قوم ايه ...البوليس قبض على كل اللي شغالين هناك تقريبا 13 واحد بالاضافة للامن زيادة توكيد لان الحرص واجب بعد وقوع الجريمة و قالوا ان اكيد الحرامي واحد منهم
بالرغم ان كل اللي داخلين و خارجين المطبعة مفيهمش واحد بيتفتش و الدنيا امان و الجو بديع و من امنك لم تخونه و الحمد لله انها جت في مطبعة فلوس و اللي اتكسر يتصلح و اللي اتسرق يتطبع غيره و متنرفزش نفسك يا ابو محمد و الماكنة موجودة و الورق متلتل و نطبع 5 مليون بدل الفكة دي يعني هي جت على الغلابة ووقفت يا خويا

بس في حاجة غريبة في القصة دي
في الاول قالوا المبلغ المسروق 800 ألف و بعد يومين اكتشفوا ان فيه 2 مليون كمان مسروقين هل يا ترى الحرامي الخايب سرق ال800 بس و بعد كدة واحد تاني سرق ال2 مليون و بعدين حيشيلوه الليلة كلها ؟؟
سؤال يطرح نفسه داخل قلوب المرتابين

بس الحمد انا مطمنه ان القضية دي حتخلص على خير و خصوصا و اننا عارفين ان المجرم واحد من اتنين
يا الماس الكهربائي
يا المختل عقلياً

Thursday, April 22, 2010

من اجلك انت حنجيب اجلك





اولا مش عايزة حد يفهمني صح
مبدأيا انا موافقة على اقتراح الثلاث ( نوائب) بتوع مجلس الشعب و الخاص بضرب المتظاهرين بالنار و مش الرصاص بس لا بالجزم كمان و بعدين بالقنابل العنقودية و يا سلام لو يحدوفوا عليهم كام قنبلة نووية
ليه بقى انا موافقة

اولا الناس دي دفعوا فلوس قد كدة عشان يبقوا نوايب في البرطمان و يركبوا الحصانة و يدلدلوا رجليهم و يخدموك يا شعب يا تعبان يا صدمان يا ندمان يللي مطمرش فيك ال 50 جنية بتاعت الصوت الواحد و في بعض الاحيان 100 جنية غير قماش اليفط اللي فصلتوا بيه فساتين و جلاليب

ثانيا هما مين اللي جابهم يعني !!! مش انتووا يا مواطنين اللي انتخبتوهم و صوتكم اتنبح في تشجيع ابن ( الدايرة ) – و الله وحده اعلم بالنوايا - و لو مش انتوا مش هم بردوا استخدموا اسماء الاموات المصريين ، يعني احنا السبب بردو و حتى لو انت منتخبتش اساسا فسلبيتك خلتهم يبقوا اعضاء في الهباب البرلمان


ثالثا النواب دول حزب وطني و كلنا عارفين شعار الحزب ( فكر جديد ) هو مش دة فكر كتير بردو يا مثقفين و متعلمين ، بذمتكم في أي نوايب من أي دولة فكروا في الافكار النميسة دي و خصوصا ان هما حيخرجوكم من الدنيا بمرتبة الشهداء يعني قصدهم شريف

رابعاً اذا طلع العيب من اهل العيب ميبقاش عيب بل يبقى عادي خالص
مستغربين ليه اوي كدة ما طول دورات المجلس بنسمع عن نواب القروض و نواب العلاج المجاني و نواب تأشيرات الحج و العمرة و نواب التزوير و نواب الاراضي و نواب القمار و تهريب الموبيلات ( هو كان مهربهم علشان يديهم لاهل الدايرة ) زي ما قال النائب المحترم و فكرني باستيفان روستي لما كان بيسرق عمر الشريف في فيلم سيدة القصر و قالوا عشان اهاديك بيهم – كان ناقصنا بس لقب نواب الرصاص - يبقى ايه سر الصدمة اللي احنا فيها دي

خامساً الناس دي عايزة تطبق ( الانون) و الدستور بتيجي تعترضوا على ايه اصلا و بهذه المناسبة اطالب بتطبيق شرع الله و هو حد السرقة الخاص بقطع يد السارق و ربنا يستر

سادسا نفسي اعرف الشعب دة متبت فيها كدة ليه مع ان الدولة و رجالها عملوا كل حاجة عشان نموت ايشي قمح بدوده و ايشي مبيدات مسرطنة و ايشي اكياس دم ملوثة و ايشي مية مجاري و ايشي فواتير اشكال و الوان و ايشي ضرايب دي الضريبة العقارية لوحدها تجيب ازمة قلبية و بردو متبتين فيها فالناس خلاص تعبت مننا و كان لازم تفكر في فكرة تانية عشان نموت و عادي جدا ان التوجه يكون ناحية الرصاص يمكن نموت المرة دي بقى و نريحهم او حتى نهاجر لهضبة التبت بما اننا تبتين بالفطرة او على الاقل نطالب بحقنا الاصيل فيها

بس كان نفسي السادة النواب المحصنين يسألوا نفسهم الناس دي ليه خرجت في مظاهرات ليه نبحت حسها ليه سابت بيتها و اشغالها ووقفوا في الشوارع بالساعات
ما هو لو كل واحد شاف شغله مكنش حد لا خرج في مظاهرة و لا وقف في احتجاج و لا عمل اعتصام
ليه مش حاسين اننا لو 85 مليون نملة حنقدر نقضي عليهم مع اني اعتقد اننا كشعب حنكون ارحم بيهم و نكتفي بطريقة ام علي مع شجرة الدر و خصوصا ان النواب دول غشم اوي في حد يقول كدة و احنا داخلين على ايام مفترجة و الانتخابات قربت

و في النهاية احب اقول
و مش حنسلم مش حنبيع مش حنوافق على التظبيط و ايييييييييييييييييييييييييييييييييييييييييييييييييه

Wednesday, April 14, 2010

فين حشيشك يا مصر



كل الللي يعرفوني هنا عارفين كويس ان كل مصيبة بشك في الحكومة
لكن الغريب ان المرة دي و رغم انها مش مصيبة لكن بردو شكيت في الحكومة
كلنا ( قرأنا مش عشان بندور ) في الصحف و المجلات عن ان الحشيش شاحح اليومين دول و ان ( المدخن) بيدوخ دوخة الست اللي رافعة قضية نفقة لحد ما يلاقي قرش

الحشيش راح فين
انا سافرت ايام ازمة الانابيب و رجعت لقيت ازمة حشيش
دة احنا كنا دولة منتجة ،يا ترى هل دة ليه دعوة بعجز الموازنة العامة

هل اقتراب الانتخابات ليه علاقة باختفاء الحشيش حيث انه من المعروف ان بعض المرشحين ( الشرفاء) يقوموا بشراء الاصوات الانتخابية بقروش الحشيش و بعض الاقراص الاخرى ( 8-9% يدخنوا الحشيش ) عملية نضيفة 100%

هل هي حملات الداخلية الاخيرة على اباطرة المخدرات ( زي ما بتقول الحكومة ) هي السبب ، طب معلش كانوا فين من زمان
دة انا اسمع ان بعض الافراح الشعبية المخدرات بتتوزع فيها زي الشربات

هل هي الطريقة المعهودة لرفع سعر السلعة باخفائها و تعطيش السوق لفترة ثم ظهورها و التاجر يلم الغلة في حجره بالساهل و يبقى عندنا احتكار للحشيش يعني هو اقل من الحديد في ايه دة الفرق حرف واحد

هل هي طريقة لترويج انواع اخرى من المخدرات و مكافحة النوع الشعبي و الحشاشين بقى يجربوا انواع تانية و يرجعوا للبانجو و الماريجوانا و خصوصا ان صورة الماريجوانا بقت ملزقة على اغلب الاشياء و ادام عنينا طول الوقت
طب هل هي نظرية المؤامرة يعني مثلا نفكر ان اسرائيل هي السبب فقررت تحول الدفة من الحشيش الشعبي لان بعض البسطاء يعتقدوا زي نور الشريف في فيلم العار ان الحشيش اعشاب مش مخدرات فلمت كل الحشيش عشان تخلي الناس تشرب هيروين مثلا


اتخيل ان الصين دلوقتي و خصوصا انها دولة قاعدة للساقطة و اللاقطة و عارفة تسد جميع احتياجات الشعوب من كل شيء قاعدين في غرزة صيني و بيصنعوا حشيش صيني و حتنزل بيه على رمضان كدة و تحرق السوق باسعار ليس لها مثيل ، فينك يا جهاز حماية المستهلك

الغريب في الامر ان موضوع اختفاء الحشيش من الاسواق بقى معروف و كل الناس بتتكلم عادي على ان الحشيش شاحح و كأنه سلعة تموينية زي السكر و الزيت و الا حتى مدرج في البورصة مش غريبة دي
حتى انا اللي حتى لا اشرب الشاي اول ما فكرت في موضوع اكتبه قررت ( انفس ) بيه عن نفسي طلع عن الحشيش
و بمناسبة موضة الاعتصامات و الاحتجاجات و الوقفات و انتشارهم لا استبعد ابدا وجود اعتصام او وقفة احتجاجية تنادي بتوفير الحشيش و بناء الغرز او توفير الكلُلة هي يعني سويسرا احسن منا
دي بقت هي اللي بتستورد الحشيش بنفسها من الدول المنتجة علشان تضمن انه لا يتم خلطة بمواد مسممة و يبقى خطر على الحشاش السويسري المحترم لانه لازم يبقى حشيش بيور عشان صدره مش زي خلطة يحيى الفخراني في فيلم الكيف ، طبعا ملناش دعوة بالعالم دي ، دول بيعملوا دراسات و حاجات كبيرة تجيب صداع و احنا ناس دماغنا اكبر من كدة

عشان كدة و من موقعي هذا اعتقد ان السبب الحقيقي لازمة الحشيش ان محدش عارف يفيش الهوامش
و الحل الوحيد ان الحكومة تفتح باب الاستيراد و تدعم الحشيش و تنزله على بطاقات التموين و لا تفرض عليه أي ضرايب بطرسية عشان النفس

Tuesday, September 8, 2009

لو جدع قول للغلط لأ


طلعتلنا الحكومة في مقدر جديد متمثل في وزراة النقل و المواصلات و بالذات السكك الحديد في طوفان من الاعلانات
يعني ايش معنى الضرايب و عبد القوي ابو نوتة بمبي بسوستة
حملة عجيبة جدا
متمثلة في مجموعتين

المجموعة الاولى عبارة عن اعلانات تحفة اكتشفت ان القطارات هي افضل وسيلة مواصلات في الكون
واحد قاعد مع مراته و الا معرفش مين في مكان شيك و لسة ما شربتش العصير
و بيقولها يلا بقى نقوم نمشي عشان انا مسافر بكرة و حتفعص في ا( الميكروباز)
لا و ايه المسافة بينه و بين كتف اللي جمبة مش عارفة كام سم

ولد تاني قاعد على البحر مع اصحابة بيشكي همه و يقولهم انه وشه لزق في رجله من الشنط اللي كانت في عربيتهم الملاكي
فلو سافر بالقطر كان لعب في مراجيح السبتية اللي في القطر و مكنش اتبهدل في عربيتهم و دة يا عيني المسافة بين رجه ووشه سالب كذا سم

واحدة مسافرة في الاتوبيس و روكبها يا عيني حتخرج من الكرسي اللي قدامها
فلو سافرت بالقطر كانت مدت رجليها و ارتاحت

و دي كانت المجموعة الاولى اللي كان ناقص تقول فيها ان الاستاذ محسن الفنجري رجل الاعمال الشهير مسافر بيمضي عقد في لندن لكن لان الطيران مخيف و المسافة بينه و بين اللي جمبة كبيرة فركب القطر عشان الونس

او مثلا
كايل اكس واي و هو جاي في مركبته الفضائية كان مخنوق لان الاشكال فيها ما تسرش القلب فلو جه من المريخ بالقطر كان شاف المناظر اللي تشرح القلب الحزين

معرفش بيجيبوا الافكار دي منين
هي الناس لحقت تنسى حريقة القطر
و الا الست اللي وقعت من ارضية حمام القطر !!

الحملة التانية بقى و هي فاكهة رمضان
المصري اللي على حق يقول للغلط لأ

وزارة المواصلات خلاص رمت طوبتنا و مننا فينا بقى نتصرف
يا جماعة القطارات الجديدة دي بتاعتكم
شايف الواد دة اللي بيغز الكرسي بتاع القطر الكرسي دة بتاعك يا رأفت
و مصر امانة في ايديك

و الا الست دي اللي يتقلي بتنجان و طعمية في نص القطر
الطعمية دي بتاعتك يامحسن بية و سمعني سلام رأفت الهجان

و الا الولد اللي بيخربش في الشباك
و الا اللي جايب صاحبه و يسطح فوق القطر
و الا الحرامي اللي سرق حنفيتك يا مغفل
لالالالالالالالالالالالالالالالالالالالا
انت المسئول و خلاص حنعينك مخبر للوزراة
احنا خلاص مالناش دعوة القطارات الجديدة دي بتاعتكم و بفلوسكم
يبقى تاخدوا بالكم منها و تفضلوا تلألأوا طول النهار
لان المصري معروف بقوته و جبروته (ووثيق) من الفوز
لما كنا احنا المسئولين القطارات كانت بتولع و بتتقلب و الحواداث كانت متلتلة
فاحنا خلاص شيلنا ادينا و انت المسئول اهو و طلعنهالك في التليفزيون وورينا شطارتك

لا بقى معلش يا حكومة
انا مقدرش اقول لواحد ماسك مطوة و بيخرم في الكرسي لا
ما يمكن يغزني انا
فين العساكر بتوعك
فين الشرطة
فين المخبرين
فين الرقابة
مش معنى انك خدتي فلوسنا و جبتي بيها قطرين جداد و بباقي الفلوس عملتي حملة بملايين الجنيهات ان انا اللي اتصدى للبلطجي اللي معاه مطوة و الا الست اللي ممكن تحدفني بالباجور
الحملة دي المفروض متعملهاش وزارة المواصلات
الحملة دي تبقى حمله للتوعية و تعليم الادب و الذوق للناس


بس بصراحة اغرب حاجة في الحملة دي ان الحكومة باقلها سنين بتعلمنا تقول نـــــــــــــــــعم
و المرة دي بتعلمنا نقول لأ
فمش بعيد الحملة الجاية تخلينا نقول ( كفاية
ههه كل شيء جايز

Wednesday, July 15, 2009

مزاج حكومي مدعم


قاعدة بتفرج على التليفزيون في امانة الله
على الحياة اليوم الاقيهم بيقولوا
وزارة الزراعة تتحفظ على ١٣ ألف طن ذرة لاحتوائها على بذور «القنب» لإنتاج مخدر «الحشيش» كانت مستورداهم من اوكرانيا
اقلب على معتز 90دقيقة
الاقيه بيقول نفس الكلام
معقول!!!
طب و يا ترى ال 13الف طن دول فيهم كام طن قنب و كام طن درة
يعني هل هي قسمة العدل
طبعا تغلبت على شيطاني و قولت اكيد ان الحكومة جايبة الدرة دة و حتعمل بيه اكل مدعم
و تنافس تجار الحشيش الجشعين بعد توزيعها للحشيش المدعم
او يمكن بتساعد الشعب يعمل دماغ عشان لما يضرب دماغه في الحيط ما يحسش بحاجة
الغريب ان اوكرانيا بتزرع درة او قمح لدرجة ان علمها نصه اصفر رمز للقمح و نصه ازرق مش عارفة رمز لاية لكن مش اكيد الحشيش لان الحشيش على ما اعتقد مش ازرق
لكن الغريب انها مش مشهورة بزراعة الحشيش
يعني لو الشحنة دي جاية من افغانستان مثلا اقول ايوة فيها حشيش و افيون كمان
لكن ايه اللي جاب بذور الحشيش في بذور الدرة الى اوكرانيا
هل هي طريقة تهريب جديدة للمخدرات
طب و بعد الدرة ما بقت محششة
العيال اللي بيشوا درة في الشارع حيشوه عيني عينك كدة و الا شوي الدرة حيبقى في الغرز و القهاوي و اماكن التعاطي
هل ممكن البوليس يقبض على واحد بياخد حقنة درة !!
او بيشم دقيق درة
هل الدرة حتضاف لجدول المخدرات
اسئلة لازم نعرف اجابتها قبل ما نقدم على ادمان الدرة
بس بردو لازم نشكر الحكومة لانها بعد ما جابت القمح المسمم جابت الدرة اللي حيخلينا
نعمل دماغ و نبطل صداع
المشكلة بس بجد اني ابتديت اقلق علينا
بعد ما نموت من الحاجات دي
الكُناسة بتاعت الدول دي حتترمي فين

Wednesday, May 13, 2009

اوباما زكي جمعة قلب الاسد


اختلفت الاراء في موضوع زيارة اوباما لمصر
فمنهم اللي معارض و خلاص و نظام خلقنا نعترض و قال ايه عايزين ينظموا وقفة احتجاجية في احد الميادين العامة اثناء الزيارة
قال يعني دة ينفع
دة مش بعيد ياخدوا الراجل من برة برة على شرم الشيخ عشان ميشوفش مناظرنا اللي تكسف
و دة حيكون احسن لينا
دة احنا لما وزير يكون مروح البلد بتتقفل من الضهر لحد ما يوصل بيتهم و يغير و يتغدى و يريح شويه نقوم احنا نوصل بيوتنا على ميعاد المسلسل العربي
فما بالكم بقا من لما يبقى الحاج اوباما
دة مش بعيد يتفرض حظر التجول

و منهم اللي فرحان و كأن اوباما جاي يخطب من مصر مش يخطب في مصر
بالرغم يعني ان مصر مكنش مطروحة و الاختيارات كانت ما بين تركيا و اندونسيا
و بالفعل هو زار تركيا الاول و بعدين الحمد لله حصلت حاجة خفية خليتهم افتكروا ان مخاطبة العالم الاسلامي لازم تكون من مصر لانها قلب العالم مش عشان يعني انها بلد الازهر الشريف
و عموما اياً كان السبب
اذا كان السبب الافراج عن ايمن نور و الا حتى ان اوباما شاف الحسين في المنام و جاي يلبي
و الا جتله زيارة من البلد فيها فطير و بط و جاي يرد الزيارة و يرجع السبت
المهم اننا امام زيارة مهمة جداً مفيش ادامنا فيها غير اننا نقف على عتبة الدار و نقوله يادي النور يا دي النور بيتك و مطرحك
بالرغم اني خايفة يكون جاي يعاين المنطقة اصل امريكا دي مالهاش امان
و خصوصا ان الراجل دة فيه كذا مشكلة
اولا اسمه ( باراك ) و الاسم دة اساساً شؤم و تحس ان ريحته وحشة و متعاص يهود او حاجة كدة حتبرك على صدرك
ثانيا هو الرئيس رقم اربعة و اربعين
و احنا عارفين ايه هي عيلة اربعة و اربعين
ثالثا اتحدد ميعاد الزيارة يوم اربعة يونية و دي ليلة رأس السنة بتاعت النكسة و الله اعلم صدفة و الا من بختنا المايل
ثالثاً الراجل دة سياسي محنك و و سوسة مبتهج كدة عمال على بطال
و تحس انه متباسط كدة و مش بعيد يكون بيشتري لبسه من wekalet ELBALHبتاعت امريكا


المهم ان الراجل جاي ان شاء الله
حيعمل ايه محدش عارف
الخطاب دة حنستفيد منه ايه الله اعلم
المهم ان المتفائلين تفائلهم زاد و محسسني ان اوباما دة قريبهم اللي جاي من الخليج شايل و محمل هدايا و حيلف بيها على المصريين
و مش بعيد يقرص عى الحكومة و يخليهم يوزعوا جبنة نستو على العيش المسرطن

طب تركيا على الاقل استفادت وعد منه انها حتنضم للاتحاد الاوربي
لكن احنا حنستفيد ايه
يمكن يخلي مصر سنتنضم للاتحاد الاوربي هي كمان
بصراحة انا لا متفائلة و لا متشائمة لكن انا شايفة ان الرجل دة المفروض يلف على كعابه كل الدول عشان يحسن صورة امريكا اللي اتبهدلت بسبب سياسات القرد بوش و شركاه و تحسين صورة امريكا امام العالم