قطايف جلاش هو استعراض لاخبار مصرنا الحبيبة الله يرحمها و ذلك في رمضان 1429 -2008
-----------------------------------------------------
1- القوات المسلحة
حريق مجلس الشورى تم اطفاءة على ايدي القوات المسلحة
خيام اهالي الدويقة قام بنصبها القوات المسلحة
القوات المسلحة تقوم بتوزيع بطاطين و وجبات على الاهالي
القوات المسلحة تقوم بعمليات الانقاذ
هو في ايه هي القوات المسلحة هي اللي بتعمل كل حاجة في البلد دي فين قوات الاطفاء فين المحليات فين الوزارات فين مليون حد ممكن يتسأل عليه
تنبؤات مستقبلية
استدعاء القوات المسلحة علشان ام عبدة بتولد و متعسرة شوية
------------------------------------------------------------------------
2- القبض على هشام طلعت مصطفى
كل واحد يطلع نص جنية لاني تنبأت انه رايح في داهية من حوالي 3 شهور لانه وقف في وش العفريت و قال بخ
و قولت ان الراجل دة مش حيكمل سنة 2008 غير و هو في سجن المزرعة ( طرة )
ملحوظة
سجن المزرعة خلاص حيبقى بالواسطة لان زمايلك كُبارات البلد
حاليا طلعت مصطفى - حسام ابو الفتوح - ايمن نور على ما اعتقد و كل الكبار بيتسجنوا فيه
الغريب في القصة
- القتيلة لبنانية و الجريمة في دبي و حظر النشر في مصر فقط !! ( بس خلاص الحظر اتشال )
- 2 مليون دولار ( حوالي 11 مليون جنية ) للقاتل علشان ينفذ ( طب كان ادى لسلومة الاقرع 500 جنية و خلص من سكات )
- تعليق القاتل ان المبلغ ماهو الا سيجارة في علبة سجاير الباشا
- القاتل ظابط بوليس سابق !!!!
تنبؤات مستقبلية
- سيناريو (1) الباشا برئ
- سيناريو (2) الباشا حيكمل ثلاثية و مثلث برمودا هاني شرور و مذموم اسماعيل
- سيناريو (3) انتحار السكري
- سيناريو (4) اعدام للجميع و دة مستبعد تماما
-------------------------------------------------------------------------------------
الحديد
قام الباشا العزيز على قلوبنا كلنا بتخفيض ثمن طن الحديد 800 جنية و سينخفض تاني الشهر القادم
فاصبح الفأر يلعب استغماية في راسي
هل يا ترى هو بيعمل كدة علشان اسعار المباني تنخفض و يتم ربط الانخفاض بالقبض على طلعت مصطفى و خصوصا ان الحمد لله شقة مدينتي رخصت 20 ألف جنية بحالهم و بقت خلاص في متناول ايدي الشباب العشوائيين ( 650 ألف جنية مصري لا غير ) و دة كان سبب الخلاف بينهم و كل واحد كا بيقول ان التاني سبب ارتفاع اسعار الشقق
و الا تعليمات من سلطات اقوى منه و خصوصا ان الحديد في رومانيا الطن ب 2500 جنية فقط
تنبؤات مستقبلية
الدور الدور الدور الدور موعودة يللي عليكي الدور
ما طار طيراً و ارتفع الا و اتهبد على بوزه بعد كدة
----------------------------------------------------------------------------
الاسعار
بعد انخفاض اسعار البترول عالمياً لدرجة تقليل الانتاج
و انخفاض اسعار السلع عموما على مستوى العالم
الا ان مصرنا الحبيبة و تجارها الشرفاء وقفوا بمنتهى الشموخ و ثبتوا الاسعار العالية و تمسكوا بها
فوصل كيلو اللبن لـ 5.25 و بالتالي اسعار الجبن و الزبادي
كيلو العدس 18 جنية
و البيضة الى 0.85 قرش !!!!
الفول بـ 7 جنية
طب احنا بنرتفع مع العالم اومال ليه مش بننخفض مع العالم
-----------------------------------------------------------------------
الاعلانات
اعلانات احمد حلمي و كريم عبد العزيز سم ناقع
و ضد منتج الاعلان
--------------------------------------------------
اعلانات الضرايب العقارية تهزيق للشعب المصري من حامي حمى المالية الوزير الهمام
كل شوية يطلع لنا الراجل اللي حيفوترنا دة و لو متفوترتش و اتعممت يبقى حتتسجن
طب هو عامل نفسة بيخاف على الفلوس بتاعت الشعب
قاعد يصرف فلوسنا على الاعلانات ليه
مش كفاية فلوس المعاشات اللي ضاعت في البورصة
--------------------------------------------------------------------
جلاشياية اخيرة للحكومة الذكية اوي
اتمنى من الحكومة تشكيل الاسم بطريقة سليمة و هو كالتالي :
حـــَكَومّه
بمعنى سوف اكومة و اجعلة كوم و هو هذا الشعب البائس
مش حقولك انك سبب المصايب و الا دة تقصير منك في شئ
حقولك امشي و حلي عننا عشان وشك كان نحس
---------------------------------------------------------------------------
بعد حصول البعثة الاوليمبكية الثانية على ميداليات ذهبية و فضية و برونزية اعتقد اننا بعتنا المعوقين في الاول
----------------------------------------------------------------------------------
استقبل اهالي الدويقة السيد المحافظ و عضو مجلس الشعب بهتافات و قذائف من النوع الثقيل
و هذا ليس قلة ادباً منهم فكل واحد بيدي من اللي عنده و هما يا عيني معندهمش غير الحجارة لو كنتم ادتوهم حاجة تانية كنتم اكيد خدتم منها
و الحمد لله اصبح عندنا انتفاضة بالحجارة
-------------------------------------------------------------------------------------------
داليا البحيري في تمثيلية بنت من الزمن دة
بتبيع فل في الاشارات و العفانة عليها شبر و جاهلة و بتتكلم بطريقة سوقية و ابوها سكير و حرامي و مبرشم و اخوها حرامي و اخواتها خدامين و كلهم متربيين في الشارع
و و الولد ابن الاكابر اللي عنده عربية جيب و ساكن في فيلا بيموت في هواها و بيدوب فيها و جايبلها شقة تشرح القلب الحزين و نفسه يتجوزها و بيتغزل فيها طول التمثيلية و بيقولها كلام يدوخ
الى كل فتاة لم يأتي نصيبها بعد و الناس بتقولها اتجدعني و مش عارفة تعمل ايه
اليكي الطريقة و حصرياً
1- البسي بنطلون بيجامة قذر و عليه توب شيك بس مش نضيف
2- شعرك يكون حرير و مكوي و سايب و عاملاه عند محمد الصغير و لا بسة علية ايشارب بس شعرك يكون سايح و نايح من تحت الايشارب
3- شوية فل في فتلة و تجري في الاشارات بين العربيات
و الحلاوة بعد ما يحصل النصيب
بس متنسيش تدعيلي لما تتجوزي واحد ابن وزير و الا حاجة
----------------------------------------------------------------------------------------------
في تصريحات لوزارة السياحة ان اسعار الحج تبدأ من 20 ألف جنية
الف حمد و شكر ليك يا رب انك قولت انه لمن استطاع اليه سبيلا
فكل السبل تقطعت علينا المصيبة بقا ان السعودية اكتشفت ان الوزارة بتبيع التأشيرات المجانية ( من موقع مصراوي الله اعلم ) لشركات السياحة و بتهدد بسحب هذه التأشيرات المجانية
مش عارفة ليه ابتديت اصدق النكتة بتاعت ان الحج حيكون في ميدان الحجاز
----------------------------------------------------------------------------------------
اصرار الحكومة على عدم تأجيل الدراسة الى بعد العيد
تأكيد على سعيها الدؤوب لعكننة الشعب المصري و حرق دمه بجاز مش نضيف
----------------------------------------------------------------------------------------------
بيان جهاز التعبئة و الاحصاء ان 90% من العاطلين تتراوح اعمارهم من 15 - 29 تأكيد منه على الحث على الجهل و
ترك التعليم و الاشتراك في مشروع نحو الامية
-----------------------------------------------------------------------------------------------
اجمل حاجة في تمثيلية بعد الفراق رغم انها حلوة اغنية التتر كلمات ايمن بهجت قمر
اكتر حاجة توجع في لحظة الفراق حبيبك تلمحه
ودموعة رافضة تطلع و كأنة حالاً فاق على ايد بتدبحه
و كأن دة عادي
لأ و اقل كمان من العادي
و الوقت دة كله في عمر الواحد راح عالفاضي
و مابين لقا و فراق كأننا في سباق
ودة يبكي و هو مفارق
ودة فارق و مهوش فارق
مين فينا وفى بوعدة و مخافش من اللي فات
و اتبقى في مطرحه
طريق مفتوح وبعاد
و صوت طالع بخوف
بيعلق الاسباب على شماعة الظروف
خلاص مفيش جراح خلاص الوقت فات
معقول في حد مات حتقدر تجرحه
-------------------------------------------------------------------------
شماتة المصريين فيما يجرى للحكومة و البلد بيوقع قلبي في رجلي
ربنا يستر
---------------------------------------------------------------------------
وفاة مواطن في قسم الظاهر نتيجة التعذيب تأكيد على ضرورة تعديل المثل القديم الى
(في الاقسام يقتل المرء أو يهان )
---------------------------------------------------------------------------------------
انجلينا جولي و برادبيت يتبرعان ب 2 مليون دولار لاثيوبيا لانشاء جمعية لعلاج الاطفال من مرضى الايدز
2
مليون دولار للسكري لقتل سوزان تميم له في ذلك حكم
------------------------------------------------------------------------------------------
خبر اليوم
بعد انهيار البورصات العالمية
مخاوف من الاثار السلبية على الاقتصاد المصري بسبب الازمات الامريكية
لا متخفوش اطمنوا على الاخر
احنا الحمد لله معندناش اقتصاد
--------------------------------------------------------------------------------------------------
رشيد يقرر مد الاوكازيون الى 30 سبتمبر
!!!!!!!!!!!!!!!!!!! حنعمل ايه في الاوكازيون بتاع الهلاهيل
يا ريت تعمل اوكازيون على المم و الاكل
و هنايلك يا فاعل الخير و الثواب
يا الله يا ولي الصابرين
-----------------------------------------------------------------------------------
قال ايه في لاصقة طبية بتتلزق على الذراع لمنع الاحساس بالجوع و العطش
المصيبة بقا ان المفتيين ( ليهم اسم تاني ) قالوا عليها مش بتفطر
السؤال بقا
هما صايمين ليه مدام مش حيحسوا بالجوع و العطش
يفطروا احسن
---------------------------------------------------------------------------------------------
راكبة اخرت الطيارة بعد لما خافت تركب بعد ما دعى عليها رجل عشان لقاها بتشرب سجاير في نهار رمضان
طب و الله حسيسة
على الاقل مش حاطة لازقة
-----------------------------------------------------------------------------------------------
القبض على المتهم الاول في قضية الدويقة اللي هو القضاء و القدر
-------------------------------------------------------------------------------------------------احساس عجيب ان اغلب الناس اللي ماشية في شارع الجلاء فاطرين
----------------------------------------------------------------------------------------------
رجل علبة السجاير
فيه صورة كدة بتاعت واحد مرحوم محطوطة على علب السجاير
الراجل ياعيني بيطلع في الروح و محطوط تحت اجهزة و سلوك على صدرة و مضحي بنفسه علشان يطلع على العلبة و يقرف الناس اللي بتشرب السجاير منها
رد الفعل التلقائي في البلد
1- العلبة ام راجل بتتباع ارخص من العلبة ام ابو رجل مسلوخة
2- اختفاء العلب الصفيح من الموسكي اللي بيتحط فيها السجاير
العلبة الصفيح كانت يوم ما يضربها الدم بتتباع بـ6 جنية و دلوقتي و عشان العرض و الطلب العلبة بـ 30 جنية و مش موجودة
صحيح دة احنا اللي دهنا الهوا دوكو
الاكادة بقا ان الراجل رافع قضية علشان يشيلوا صورته من على علب السجاير
قال ايه ماكنش يعرف
اومال ان شاء الله كان فاكرهم بيصوروه الصورة دي عشان الباسبور
------------------------------------------------------------------------------------------
في دراسة حكومية بمناسبة الشهر الكريم الحكومة اكتشفت فجأة ان عندنا 1.5 مليون مواطن عايشين في المقابر
غير ان سكان العشوائيات 8 مليون مواطن
و اساسا لما الحكومة تقول الارقام دي تروح انت اوتوماتيك ضارب × 5
اعتقد ان بمعدلات التخطيط ومستوانا اللي احنا عايشين فيه فحيكون فيه 70 مليون مواطن عايشين في المقابر على سنة 2015
ارجع و اقول هي الحكومة مالها يعني
هي كانت مغسلة و ضامنه جنة !!! ما داهية تكون مغسلة بجد و تسكنا في المقابر عشان تعرف تشوف شغلها
-------------------------------------------------------------------------------------------
ملحوظة جانبية
سكان القاهرة الكبرى 20 مليون
سكان العشوائيات و المقابر 8 + 1.5 = 9.5 نقول 10 مليون
يعني نص سكان القاهرة الكبرى تحت خط الفقر ما بين مقابر و عشوائيات
رغم ان فيه ناس ساكنه في منازل متوارثة من ايام الايجار ما كان 50 قرش و تحت خط الفقر بردو
و ناس عايشة في شقق مشتركة و اساسا خط الفقر فوق دماغم ب 250 كيلومتر
فليحيا التقدم و لتحيا خطط التنمية
-------------------------------------------------------------------------------------------
نيجي بقا للخبير الدولي و رئيس قسم مصلحتك اولا
قال ايه يا ولاد 163 مليار جنية للدعم
طب احنا عددنا 75 مليون مواطن طب ما يدي لكل مواطن مليون جنية في ايده و هو يجيب اللي عايزة
و الحسبة كدة حتبقى اسهل و نوفر للخزنة مليارات
163مليار - 75 مليون = يتبقى 128 مليار و500 مليون جنية ( احتمال تكون الحسبة غلط دي مليارات ) مش عايزنهم و نتبرع بيهم للغلابة اللي معندهم دعم
------------------------------------------------------------------------------------------------
اما بخصوص داليا البحيري فاحب اطمنكم عليها و اقولكم انها رفضت العريس الباشمهندس صاحب الشركات لانه مش من مستواها
و حالياً عندها عرض 10000 جنية في الشهر لمدة 5 سنين و بعد الخمس سنين تاخد 5 مليون جنية على شرط انها تعيش في مركز الابحاث و متشوفش اي حد من اهلها نوهائيا
تؤتؤتؤتؤتؤ مش عايزة قر على الست عايزين نق بس
منتوا السبب مش قولتلكم اسرحوا بالفل
اتنكتوا فيها و ماعجبكمش
قال علام قال
----------------------------------------------------------------------------------------------
خبرين اعجب من بعض
و السبب في العجب هو التناقض
الخبر الاول :
مصر تطالب بتضافر الجهود الدولية لمواجهة ارتفاع اسعار السلع الغذائية
الخبر الثاني :
رشيد : ضمان استفادة المواطن المصري من انخفاض الاسعار العالمية
يعني عايزين ايه مننا
حيتضافروا و الا خلاص
------------------------------------------------------------------------------
اختطاف 11 سائح ( طليان و المان ) و 4 مصريين في الوادي الجديد و هما بيتفسحوا !!!! و مطلوب فدية 6 مليون جنية !!!!
اكيد طبعا ال 6 مليون يخصوا الالمان و الطليان لان ال4 المصرين هدية مع الباكيدج
الخوف بس ان المانيا و ايطاليا يدفعوا و المصريين يدفعلوهم تعويض الحوادث 5000 جنية للفرد
اكتر حاجة فارساني في الموضوع دة حضرة الظابط اللي اتخطف معاهم معهوش حتى موبايل يدي رنة لـ 122
اللي بسببه بقو 121
يلا بقا مستنين الحكومة تعملنا اعلان من بتوع السياحة يجيبوا فيه سايح مخطوف و هو بيقول بالانجليزي
اوووووووووووف اية دة انا عمري ما اتخطفت بالطريقة الهبلة دي
------------------------------------------------------------------------------------------
تغريم كرم جابر 200 جنية لانه ضرب سائق تاكسي
برافو كرم تستاهل ميدالية اوليمبيكية
يا خويا بدل ما تتشطر على سواق التاكسي كنت اتشطرت على اللي هروك ضرب و طلعوك في الجولة الاولى
بلا هم
-------------------------------------------------------------------------------------
براءة حسام ابو الفتوح من تهمة الاستيلاء على مليار و 400 مليون جنية من بنك القاهرة
الحمد لله الفلوس الحلال لا يمكن تضيع
مدير البنك طلع كان حاطههم في كيس نايلون تحت المكتب و كان ناسي
مدد يا شيخ حساااااااااااااااااااااااااااااااااااااااااام مدااااااااااااااااااااااااااااااااااد
و اهي دي البشارة للوافد الجديد الى المزرعة
( توضيح بسيط يقال انه سدد مليار و ال 400 مليون ليهم ضمانات )
واضح انه كان بيحوش في السجن و خصوصا ان الحكم كان 10 سنين و لما كون المبلغ سدد
اصلهم كانوا جايبنلوا حصالة في السجن
---------------------------------------------------------------------------
اخر الانباء:
وثيقة انجليزية : انجلترا مدينة لمصر ب 29 مليار استرليني منذ الحرب العالمية الاولى 
و الله و حتبشبش معاكي يا مصر
29 مليار استرليني و الاسترليني بـ10 جنية و الحسابة بتحسب
يبقى ممكن نحتل بريطانيا العظمى تخليص حق بلدنا دي مرزقة و الله
الخبير اكتشف ان فيه وثائق تثبت الدين البريطاني و متثبته في الارشيف الملكي بلندن
اهم حاجة ان الخبير يكون مترجم صح و مايكونش الدين علينا منا عارفة بختنا 
طلب اخير يا ريت و هما بيبعتواا المليارات بتاعتنا
يبقوا ما يبعتوهاش في عبارة عشان النِفس
------------------------------------------------------------------------------------
بعد السماح باستراد الحديد انخفاض السعر مع توقعات لوصول الطن ل 3500 جنية
طب و احنا مكوناش بنستورد ليه ان شاء الله
حد كان ماسك علينا ذلة و الا عزة !!!
و الا يمكن معندناش مستوردين كانوا حيموتوا و يستوردوا 
الحمد لله ان لقينا حد رشيد وسط هؤلاء الاذكاياء
-------------------------------------------------------------------------
الفرق الوحيد بين القرد المصري و القرد الشامبونجي
ان القرد المصري بيتكلم
بيتكلم كتير اوي ( لكاك جداً
)
لن اتعجب عندما يصدر قرار من جمهورية شمبونجا بتعيين القرد المصري وزير 
----------------------------------------------------------------------
حدائق الحيوان تستعد لاستقبال مليون زائر في عيد الفطر
انا طول عمري نفسي اعرف ليه جنينة الحيوان في العيد 
طيب و لو فيه مليون انسان رايحين
يا ترى الجونينة فيه كام حيوان جوا بعد الجمل اللي دبحوة
و الاسد اللي بقى يمأمأ
و الزرافةالي ماتت منتحرة
و القردة اللي قدمت استقالتها
بصراحة الله يكون في عونهم دة عيد لينا لكن اكيد مش عيد ليهم خالص 
-----------------------------------------------------------------------------------
حريق ضخم بالمسرح القومي 
هو كدة فاضل ايه لسة ماولعش طب مين اللي عليه الدور
و بعدين احنا لسة متعلمناش حاجة من الحريقة الاولانية !!!! و يا ترى مين اللي طفى
الجيش بردو و الا المطافي اللي على بعد فركة كعب اللي بيقولوا انها راحت بعد ساعتين واضح و الله و اعلم مكنتش عارفة العنوان 
و بهذه المناسبة يجب تغيير اسم مصر من المحروسة الى المحروقة و كان الله بالسر عليم
---------------------------------------------------------------------------------------------
تقرير عاملي يظهر زيادة نسبة الفساد في مصر
الحمد لله تصدرنا المجموعة
-----------------------------------------------------------------------
