Sunday, October 21, 2007

نفسك تركب ..... سمي و خش برجلك اليمين








كل الرجالة عايزة تركب عربية السيدات اللي في مترو الانفاق
يا عيني اغلبهم خيالهم مصور لهم ان عربية السيدات هي جنة الله في الارض شرحة و برحة حوالي 5 اوض و صاله و عفشة مية
دة غير انها فيها مراجيح زي بتاعت مولد النبي

و ليهم حق اصل لو حد فيهم ركب مبيلحقش يشوف

فاما انه اول ما بيدخل بيطير بسرعة قبل ما الباب يتقفل على بقة

او اقرب واحدة ليه بتعاملة على انه قرد و ركب في عربية البني ادميين فيفضل مكسوف و باصص في الارض لحد ما ينزل

فأحب اشرح لكل الرجالة اللي فاكرين عربية السيدات جنة !!! ايه هي عربية السيدات دي

مبدئياً انت حتقول دعاء الركوب كل محطة
يعني لو راكب 10 محطات حتقول 10 مرات و مش بمزاجك حتقول يعني حتقول

لان كل ما واحدة تركب تقولك يلا يا جماعة نقول مع بعض دعاء الركوب

الظريف بقا ان كتير جدا بيقولوا الدعاء غلط ( و إنا الى ربنا لمنقلبين ) منقلبين ازاي؟؟؟؟ الله و اعلم هي و الله العظيم قالت كدة

اما بقا الوصف التشريحي لعربية السيدات
عربية السيدات عبارة عن علبة كبيرة مقسمة الى 4 اقسام

اول قسم : قسم المرضى النفسيين




______________________




و دة عبارة عن الستات اللي كانوااساسا بيركبوا في عربية مشتركة عشان عربية الستات بعيدة عن المدخل و اكتشفوا عربية الستات بعد فترة و دول اغلبهم كسالى بالفطرة و مش عايزين يمشوا عشان كدة تلاقيهم مربيين لحم فطبيعي ان اغلب اللي بتشوفهم في العربية المشتركة من اصحاب الوزن التقيل و تبقى مستغرب اوي اومال الرفيعين راحوا فين




المهم يعني هما بقوا منــفسنين بسبب ركوبهم في العربيات المشتركة اللي ماليانة رجالة
فتلاقيهم في عربية الستات لو أي حد عدى من جبهم يتنفضوا كأن ادلق عليهم شاي سخن او حد لمسهم بالسلف ديفنس اللي بيكهرب دة




تاني قسم : قسم الصحة الانجابية و الولادة
----------------------------------




دول بقا شايلين عيال او بيرضعوهم او بيدوا وصفات لبعض و في بعض الاحيان تلاقي واحدة قالعة فردة الشبب بتاعتها و بتــنفض عيل من اللي معاها
او بتحدف الشبشب على عيل مشي بعيد عنها فطبيعي جدا ان الشبب دة ممكن يلبس فيك بدون أي ذنب

و بردو القسم دة فيه صريخ و صويت مش معقولين ابدا الله و اعلم هل هي آلام الولادة و الا نـــذر عليها اول ما تركب ترقع بالصوت




ثالث قسم ليه علاقة بالقسم السابق : قسم طب الاطفال ملحق بحديقة ذات مراجيح
-------------------------------------------------------------------




تلاقي عيال كتير كتير مع بعض متعرفش مين ابن مين
اللي امه بتشيلو عشان يترمجح في الايدين البيضا دي اللي بتمسك فيها عشان متنزلش على صف سنانك و تحسسك ان الولد حيلعب في الالومبيكيات

و ان انت لما بتمسك في الايد اللي الواد بيأوأ عشان يلعب بيها تبقى واقف في مسيرة البطل
حالة تانية ام قالبه ابنها و حطه رجلية عليك و بتدية لبوس عشان سخن فجأة و هي راحة عند الحاجة ام عطيات قريبتهم
و عيال قاعدة تشد في هدومك و شنطتك و بتلعب بكل ما اوتيت من قوة و مجهود في عينك و رجليك و جيوبك و لو جدع اعترض
و عيال بترجع على هدومك
و عيال بتعمل الواجب و ساندة على حجرك لو يعني اسعفك الحظ و كنت راكب من اول الخط و قاعد و مش مسموح ابدا انك تعترض دة الواد ممكن يسقط لو اعترضت في وشه كدة




القسم الرابع : قسم سوق العبور و فرع صغير من سوق الخميس




_______________________________




القسم دة بقا اظرف قسم في المترو فانت و انت قاعد تلاقي واحدة بتقور محشي في حجرها و ساندة ورقة الجورنان اللي بتقور عليها على هدومك
و لو فتحت بقك تقولك معلش اصل البية اللي ربنا بلاني بيه لو جه و ملاقنيش خلصت حيطين عيشتي و هي طين اساسا و مش ناصة عوصة
و تلاقي نفسك دخلت في حوار طويل عريض يوصلك لحد جوازة بنت اخت جارتهم الخسيسة اللي معزمتهاش على الفرح
واحدة تانية بقا تسأل هو كيلو الفجل بكام طب و اللحمة اصلي طابخة انهارة مكرونة و بيض مزغلل و متقدرش تستوعب ابدا سر سؤالها عن اللحمة و الفجل و علاقتهم بالمكرونة و البيض المزغلل




و بعدين بقا ندخل على الشوبينج بتاع سوق الخميس
دة ظريف جدا تقدر تدخل على المدام و الاولاد بحاجات ظريفة جدا من اول لعبة لحمادة بجنية لحد غطا غسالة ب 20 جنية و هو في كل حتة ب 25 جنية و نص
طبعا تشتري زي الباشا و انت قاعد
دة غير ان فيه تنوع مذهل في البضاعة
اغلبها حجات محجات معاصم و شرابات و اسدال صلاة و كلة يا بلاش بتراب الفلوس حلقان و اكسسوارات و غيارات و كله ناقص بس قطع غيار السيارات
بس دة طبعا سلعة غير مرغوب فيها لان حضرتك راكب المترو

بس المفاجأة بقا اللي انت ملاحظتهاش من ساعت ركبت هي الريحة التي لا تخطأها أي مناخير ريحهة فظيعة فظيعة

عبارة عن ريحة البامبرز اللي مرمي في الاركان و الاطفال اللي لسة لابسة البامبرز اللي مترماش و طبعا لما تيجي تنزل لازم تحضر نفسك قبلها بمحطتين يأما حتفضل راكب للاخر




عشان كدة نصيحي ليكِ اركب عربية الرجالة ان شالله بس عشان الريحة دي على الاقل ممكن تلاقي واحد في عربية الرجالة حاطط لوسيون بعد الحلاقة بدل ما تنزلي ريحتك محشي و بامبرز دة غير الصداع و مقدمات الانهيار العصبي

وصف تفصيلي للعربة المشتركة ( اعتقاداً انها عربية الرجالة )




_______________________________




اول هام هي مش عربية الرجالة لكن الرجالة احتلوها بوضع اليد هي اساسا عربية للجميع و هي مخصصة ان اي حد يركب فيها لكن بقا الرجالة لما لقوا فيه تخصيص عربية للستات الغلابة احتلوا المترو مقابل العربية اليتيمة اللي هما بردو بيركبوا فيها بس بتذكرة اغلى شوية ب 10 جنية او 5 جنية في بعض الاحيان




ندخل بقا عربية الرجالة اللي هي في الحقيقة مشــــــــــــتركةدي بقا لازم تدخلها و انت مغمض العين مسدود الانف و لو ما عملتش كدة حيتعملك غصم و اقتدار




العربية دي اساسا للجميع زي القراءة للجميع كدة يعني من حقي اني اركبها اول حاجة لو واحدة ست جت دخلت تبص تلاقي واحد يبص في وشها و يستغفر ربنا زي ما تكون دخلت علية بتـطوح و في حالة سكر بـّـين




و الله بتجرالي كتير و اصبر نفسي و اقول الحمد لله انه استغفر ربنا بس و مـــتفش عليا




ودي اول عينة بقا في القسم الرجالي




العينة التانية




تحسسك ان الستات دول مجرد مجموعة مارقة من الذئبات المتحرشات و جاية مخصوص عشان تتحرش بالابرياء الغافلين الراكبين العربية المخصصة ليهم رغم انها مش عربية رجالي و الله العظيم دي عربية مشتركة




العينة التالتة
هما شوية حبيبة او ارباب اسر و مراتتهم راكبة في عربية السيدات
و دول بقا تلاقيهم ملزوقين في الحتة بتاعت الباب بتاع الشباك اللي بيبص على الشارع قصدي بيبص على عربية الستات اللي راكب فيها نصهم الحلو طبعا و متفهموش هل بيبصوا عليهم بيتمنوا ان العربية بتاعتهم تنفصل قضاء و قدر و الا ايه .




العينة الرابعة




العينة دي لزقت بغرا سريع الالتصاق في الحتة اللي وقفت فيها تزق يمين تزق شمال لازق بردو




العينة الخامسة




العينة المبصبصاتية دول بقا اول ما واحدة تركب ياخدها من فوق لتحت فحص شامل و صورة اشعة







ناهيك عن التنوع بقا في الروايح و اي ست مارقة تفتكر انهم حيقوملولها في العربية دي




اقولها هيهات او على رأي الست كوريا ((يا خي تووكة

يوم في عربية الوحوش ( السيدات سابقاً
_______________________




مش عارفة و الله ابتدي منين الحكاية اصل امبارح شوفت الويل و ضلام الليل رغم ان الساعة كانت 4:30
روحت انا و صاحبتي المترو و قولتلها تعالي نروح نركب عربية الستات كتغيير انهاردة اصلنا بقينا نركب في العربية التانية المشتركةاللي الرجالة فاكرينها ورثهم




المهم لقينا الدنيا زحمة جدا على المحطة ادام كل العربيات و كأنهم فتحوا معسكر للايواء في محطة المترو ناس كتير جدا بشكل غير طبيعي و شكلهم بايتين من يوم الجمعة اللي قبل اللي فات قولتلها تعالي نتفرج على التليفزيون لحد ما الناس دي تركب تليفزيون روعة روعة الصراحة و كانت جايب اغنية غريبة كدة اسمها سبت الغرام ادي الطرب و الا بلاش!!! عبارة عن واحد مركيبينوا سبت كبير و معرفش بيمرجحوه رايحين بيه فين و هو بيقول لحبيتو تحدفلو مشبك عشان تشبك معاه




الغريب بقا ان كان فيه واحدة غريبة جدا واقفة متسلطنة جدا مع الاغنية و تتمايل طرباً حاولت استوعب ليه ما عرفتش الصراحة




و فضلت افوت عربيات و الدنيا لسه زحمة لحد ما المغرب اذن و تأكدت ساعتها ان الناس دي ساكنة في المحطة و مش حتركب




مهو مش معقول كلهم ماوراهمش حاجة زيي و بيفتوا المترو تناكة بعد الاذان قولت لصاحبتي تعالي بقا نركب و امرنا لله و اذا فجأةً المترون جه و الله العظيم ركبت انا و هي في الرجلين كدة من غير لا شور و لا قول و مكناش حنركب اصلا و فضلت اتعصر و حاسة ان فيه حاجة وقعت مني فببص لقيت الانسيال بتاعي حد قلعهولي قولت الحمد لله انها جت على اد كدة




و مع محاولة انتحارية مني لقيت نصة في الارض اني بقا اعرف اطلع تاني ابتداً فضلت موطية كدة لحد ما الباب اتفتح في المحطة اللي بعديها و الحمد لله بفضل الله و معاونة ولاد الحلال عدلولي ضهري




لكن بقا جت محطة السادات و فجاء لقيت فيه طوفان بشري خارج وواخدني انا و صاحبتي معاه نزلنا غصب و اقتدار و لسه حنبص لبعض طوفان بشري تاني ركبنا و الباب قفل علينا و الحمد لله اطمنا اننا لسة بكامل ملابسنا لان كان فيه ناس طمعانين في البلوزة و الشنطة بتاعتي و ايشارب صاحبتي و الحمد لله بعد جهاد مرير و صيحات من التعذيب أحــــــــــــدٌ احـــــــــــــــــــــــد نزلنا بس مع قرار صائب ان كل واحد يركب المترو لازم ياخد معاه غيارين تلاتة لان فيه احتمال كبير انه ينزل ناقص قطعتين على الاقل دة لو نزل لابس اساساً


طبعا الصورة خير دليل على الجزء دة هي من تصوير شخص اسمة ماجد ابراهيم معرفوش بس كتبته للامانة العلمية




لو دققتوا في الصورة حتسألوا نفسكم هي الناس دي بتركب فين




طب اساسا اللي واقفين مستنين دورهم زي الراجل اللي شايل الكيس الاصفر حيركب فين مش عارفة




ابتديت احس ان فيه اعراض ماسوشية من نوع خاص ابتدت تجيلي ابتديت احب المترو و الضرب و الزق او يمكن ادمنت الشم



امبارح روحت بردو رغم ان كان ممكن ماروحش لكن روحت كأني رايحة الملاهي و هما هما الناس بتوع كل يوم حتى بنفس الهدوم اكيد هو معسكر للاجئين و عملوه في المترو بطريقة سرية عشان يبقا تحت الارض ومحدش يشوف



المهم كالعادة و بطريقة المُسيرين ركبت !!!!محدش يقولي ازاي



الطريقة السحرية انك تسيب نفسك خالص و هما حيودوك بطريقتهم



اول مرة احس اني انا و البني ادميين اللي معايا شوية رز وفيه ست عفية و تخينة قاعدة على شلتة و بتحشينا في بتنجاناية



هو دة احساسي بجد و الله لو سمعتوا عن رزاية قبل كدة اعترضت و مرديتش تتحشي ابقوا قولولي عملت ايه ؟



دخلنا المترو بطريقة آلية بس احقاقاً للحق امبارح المترو مكنش ريحتة و لا بابمرز و لا ليه



كان ريحتو بامية اظاهر اننا في موسم البامية و اعتقد ان كان فيه حد بيعمل نودلز جمب البامية وفجأة باب السواق الملاصق لعربية السيدات يتفتح و دي طبعا مصيبة لان الواقفين ابتدوا يطبقوا على بعض زي الهدوم اللي في غسالة اوتوماتيك وفي مرحلة العصر



و حد كدة مع السواق بيقول انزلوا المحطة الجاية و هنا حصلت البلبة و الفتنة فاقتسم الناس لمجموعات مجموعة مقتنعة ان كل الناس تنزل المحطة الجاية



و مجموعة مقتنعة ان كلام السواق موجه لناس معينة



و بالرغم اني كنت من المجموعة التانية الا اني تمنيت و بمنتهى الشر و الانانية ان الراكبات الفاتنات يفهموا غلط لكن مفيش فايدة و طبعا بعد مغامرة امبارح طلعت بمجموعة من الاقتراحات لتظبيط المترو و راحة الركاب



بصفتي رشحت نفسي وزيرة للمواصلات لان عندي من الخبرة ما يؤهلني للاصلاح التام في جميع وسائل المواصلات



و من هنا فقد قررنا الاتي مع فتح باب قبول الاقتراحات كنوع من الديموقراطية و ان اللي يتكلم يتكلم هو يعني الكلام بيلزق و حبتدي من هنا بمترو الانفاق فقط باعتبارة احد رموز التعذيب و المعاناه في مصر و دة غير مطار الانفاق اللي بيقول عليه السواق للواد الاصفر الغلس بتاع ميلودي



الخطة ( 1)



____________



سعر التذكرة حيكون 6.99 جنيهات كحد اقصى 10 محطات و كل محطة بعد كدة بجنية في واحد من المعارضة بيقول ليه ان شاء الله و ان ال 99 قرش محدش حياخدوهم اقولة ليه بقا و اقوله كمان انه لو معاه 99 قرش و المحصل مرضيش ياخدهم يبقا يبلغني :*



دة حيقلل الزحمة لان مش كل الناس حتقدر تدفع 6.99 جنية على الاقل



* حنوزع مشروب على تذكرة المترو و لو في رمضان او اتنين و خميس و صايم حتاخد بلحتين



ARTحنشتركلكوا في ال



عشان تشوفوا الماتشات و الحاجات المحتكرة و تتفرجوا على حاجات جديدة بدل اغنية سبت الغرام و اصعب دمعتين



* حنعمل كراسي منجدة بدل القصريات اللي موجودة في المحطات اللي بتقوموا منها عندكم الديسك



الخطة (2)



____________



- أ- التوسع الافقي حنطول المترو جدا يعني العربيات تكون واصلة من محطة جمال عبد الناصر مثلا لقبل محطة احمد عرابي بشوية صغيرين فتستوعب اكتر فحنضطر نفتح خروم و ابواب لمحطات المترو في جميع الشوارع



-ب - التوسع الرأسي في حالة فشل فتح الابواب في جميع ارجاء الجمهورية حنعمل المترو دورين عشان ياخد اكبر عدد ممكن



(3 )الخطة ௩



_______________



حنخلي المترو من غير سقف عشان الريحة و نبيع كل الاسقف دي و نشتري بيها شمسيات تتوزع على الركاب في الشتا على سبيل العهدة و الامانة و ذلك فقط في حالة المطرة الشديدة لكن لو بتندع بس فحنفرق ورق جرايد او ورق لحمة



الخطة (4)



__________



وضع سارية على رأس كل عربية متعلق عليها علم بنما عشان لو لا قدر الله المترو غرق و الا حاجة اقدر اتصرفلوكوا



الخطة ( 5)



__________________



جعل سعر التذكرة مرتبط بالوزن لان لو حضرتك تخين بتاخد مكانين فكل زبون يجي المترو يتوزن و اي كيلو زيادة بنص جنية و الكلام دة ينطبق بردو على الحمولات الزايدة اللي بتكون مع حضرتك



الخطة ( 6)



__________________



فرض رسوم و ضرايب بالذات ضريبة الملاهي على الستات اللي معاها عيال صغيرة عشان هما بيفسحوهم و يقعدوهم في تكييف المترو على سبيل تغيير الجو و المناظر و الخطة دي انا ضامنة الموافقة عليها لانها متماشية مع سياسة الدولة ): (:



الخطة ( 7)



______________



ارسال جميع خرائط مترو الانفاق لابن لادن عشان يفجروا و نبتدي على نضافة الحلقة الجاية كيف تركب المترو بدون اصابات و تصل لمحطتك بكامل هدومك

Monday, September 17, 2007

الشعب المصري عامل دماغ - سيبرتو و نولتوا



هو فيه ايه
حد شامم اللي انا شماه دة
و الا انا بس
ايه ريحة السبريتو الجبارة اللي في البلد دي
حد يقولي
طب بمناسبة رمضان هل استنشاق السبرتو مفطر على اساسا انه كحول يعني و مش مفطر بس !!!! لا دة مُسكر كمان
المشكلة اني كنت في الاول لوحدي اللي شامة ريحة السبرتو و كل ما اسأل حد هو انتم شامين ريحة سيبرتو ؟؟؟؟؟؟؟؟؟؟
يقولولي لا
يا جماعة دي في ريحة مستشفيات هما بيعقموا الجو و الا ايه و خصوصا اني سمعت انهم حيغسلوا مية النيل و مفهمتش حيغسلوا المية ازاي
يا ترى حيجيبوا مية مبلولة يغسلوا بيها النيل و الا حيعملوا ايه

لكن الكل كان بينكر
لدرجة اني شكيت في نفسي و افتكرت ان مناخيري هي اللي بتفرز السبرتو عشان كدة محدش شمة غيري
و اكيد اكيد حتتعمل شركة نرموكو لانتاج و تصدير السيبرتو الخام
و ابقى مصدر من مصادر السبرتو في البلد
و اصدر سبرتو خام
و يمكن كمان اتخصخص او اتأمم شركة مساهمة مصرية لانتاج و توزيع السيبرتو
بس اكتشفت بقا ان الموضوع كبر و ابتدت الناس تفوق قصدي تسكر
الناس ماشية تطوح في الشوارع و تقول انا جدع و انت مش عارف انت بتكلم مين
و بصفتي انا كمان ماليش في أي منبهات من شاي و قهوة و نسكافية و خلافة فريحة السيبرتو بتعملي دماغ جامدة اوي لدرجة اني بكتشف اني بضحك للنكت البايخة و على كل حاجة اصلا و خوفت حد يقول عليا حاجة و خصوصا ان سمعة الضحك مش ولابد في البلد لان الضحك من غير سبب كخ
معقول الحكومة تكون رشة رشة سيبرتو جريئة في البلد عشان الناس تشم و تنسى ؟؟؟؟!!!!
يعني مثلا واحد يروح يشتري كيلو سكر و يدفع فيه 3.5 جنية فتمر شوية هوا مشبعين بالسيبرتو فيتسطل و يفتكر نفسه دافع 1.35 قرش و يدفع و هو منشكح
بس الغريب ان الريحة متجددة و السبرتو دة بيطير بسرعة يعني لو ماسورة السيبرتو انفجرت في مصر بعد يومين بالكتير الريحة لازم تختفي
لكن الواضح ان الموضوع اكبر من مجرد ماسورة منفجرة
اكيد الموضوع كبير
طلعت اوشاعات قال ايه استوردنا بنزين من معرفش فين فيه كحول

احنا ليه اساسا بنستورد بنزين دة اول حاجة في الصادرات المصرية و على رأس قائمة الصادرات و اخيب عيل في اعدادي و ثانوي عارف انه البنزين رأس الصادرات المصرية
و الا احنا بنصدره يحوطولنا عليه سيبرتو و نرجع نستوردة تاني ؟؟؟؟؟؟؟؟؟؟؟؟؟!!!!!!!!!!!!!!!!
و بعدين دة السيبرتو دة خطير جدا
على سبيل المثال الاستاذ السيبرتو يعتبر مادة مخدرة
طب نعمل ايه منتنفسش مثلا
السيبرتو مادة مطهرة
يبقى اكيد البلد بتطهر ( بس يا ترى من مين من الشعب مثلا )
السيبرتو مادة قابلة للاشتعال
يبقى هو دة - اكيد حيولعوا فينا