Sunday, November 30, 2008

السعادة تسبب الانفجار



قريت خبر غريب جدا و دة موجود في الجرايد المصرية مش في جرايد تل ابيب و لا موزمبيق


قال ايه


أجرى مركز المعلومات التابع لمجلس الوزراء بحثاً على ثلاثة آلاف مواطن مصرى ( مش كائنات فضائية لابسة مصريين) من جميع شرائح المجتمع، للتعرف على منظومة القيم التى تحكم المجتمع المصرى وتشكل وجدانه بالنسبة للمجتمعات الأخرى التى تمثل ٥٥ دولة حول العالم،

و كانت النتيجة ايه بقا

٩٨٪ من المصريين يعتزون بجنسيتهم المصرية ومنهم ٧٣٪ «فخورون جداً»

إن المصريين أكثر شعوب العالم سعادة» بنسبة ٨٤٪، و أن ١٠٪ يشعرون «بالسعادة الطاغية» ونسبة التعساء لا تتجاوز ١٦٪

19 % فقط يرغبون في الهجرة من مصر



يا حلاوة يا ولاد
اومال ليس بقا تمثيل البؤس و الشقاء و احنا فرحانين و مزقطتين و مقضينها ضحك و فرفشة و كل الحكاية 16% بوساء نولع فيهم بجاز و نخلص منهم و من نكدهم

و 19% هبل مش عارفين قيمة بلدهم و عايزين يمشوا فنغورهم مطرح ماهم عايزين

و الحمد لله السفارات و البلاد بترحب بالمصريين
و معندناش و لا مصري يقف في طابور اي سفارة لانه بيزق الباب برجله و يدخل على طول

و لا وزير الخارجية بتاعنا ناشد السفارات تعامل المصريين حلو لانهم بيعاملوهم عنب على منجة

قولت جايز يعني نكون بنمثل الشقاء ادام بعض عشان احنا عارفين ان العين فلقت الحجر

لكن في الحقيقة احنا ماشاء الله الفرفشة عندنا من الصبح للعشا و مفيش اي مشاكل

و طابور العيش و البنزين و ذل المواصلات .....الخ حركات كدة و كدة و افلام

و من كتر ما زهقنا من الفرح و الهنا و الجاتوة و الحلويات بقينا بنكد على نفسنا لان نفسنا ماعت و محتاجين حاجة حرشة
فروحنا استوردنا مبيدات مسرطنة و شربناها و حطيناها على اكلنا لقينا نفسنا لسة الفرحة ماليانا

غرقنا في العبارة بمزاجنا بردو لسة فرحانين

هدينا الجبل على الدويقة لقينا نفسنا بردو لسة فرحانين

اومال نعمل ايه بس

فالعيال اللي زهقوا من الفرحة في مصر قرروا يهجوا ان شالله حتى بمركب مكسرة و يسيبوا الفرحة دي عشان بقت مملة
و حاجة تقرف

ناس تانية بردو فكرت تبيع كلاويها من كتر الملل و الزهق مش من الفقر لا سمح الله لكن كنوع من التغيير مش اكتر

ناس تالته هجت و راحت تتجلد بمزاجها في البلاد العربية لانها زهقت من الهنا اللي هما فيه هنا

ناس رابعة سابت الفيلل و القصور و شاليهات مارينا و راحوا سكنوا في اسطبل عنتر و العشوائيات لكن بردو مفيش فايدة الفرحة وراهم وراهم

كل يوم فرح فرح فرح حاجة مملة فعلا

لكن الغريب انهم فضلوا فرحانين رغم كل المجهود اللي بيعملوه

و كل شوية مركز المعلومات يلم بتاع 3000 مصري و يعمل عليهم البحث يلاقيهم لسة فرحانين و سعداء !!!!!

سالتني نفسي الامارة بالسوء طب و لما احنا كدة ليه بننشر غسيلنا المش نضيف ادام الاعداء و نشمتهم فينا

و هل الملايين اللي على القهاوي دي قاعدة بتريح شوية من الشغل عشان تستأنف نشاطها

و الناس اللي غرقت دي غرقت علشان البحر اللي غرقت فيه مش زي بحر مارينا و شرم

طيب
يقال و الله اعلم ان مستوى رفاهية الفرد بيقاس ب 3 معايير ( صحة - تعليم - ثروة )
تبص للمصريين تحتار
صحة : اتفرج على طوابير المرضى في المستشفيات الحكومية و الا طوابير معهد السرطان او القلب او مراكز الغسيل الكلوي اللهم احفظنا
تعليم : هأو - حدث و لا حرج - ممنوع الضرب في المدارس لكن ممكن القتل
ثروة : ميعرفوش غير محمد ثروة و اغلبهم عليه اقساط و مستنين ياخدوا الصكوك الحكومية عشان يبيعوها في محلات بـ2.5جنية

يبقى ازاااااااااااااااااااااااااااااااااااااااااااااااااااااااي فرحانين

ازاي بس يا عالم حد يفهمني
و هل لو انا مش سعيدة هل ابتدي بقا الف على الدكاترة عشان يشفولي علاج لاني منشقة عن الجماعة


طيب اومال الاستطلاع اللي عملته جامعة بريطانية بالاعتماد على تقارير الامم المتحدة لتصنيف الدول الاكتر سعادة بين 182 دولة و احتلينا المركز 155 على مستوى ال 182 دولة يبقى ايه لا و المصيبة بقا جينا بعد جيبوتي و بنين و شوية بلاد افريقية كدة غلبانة جداً و بلد كدة اسمها ((لاوس )) انا عن نفسي معرفش يطلع ايه لاوس دة بس المصيبة اننا جينا بعدها كمان
يعني المواطن اللاوسي سعيد اكتر من المصري

منا طبعا مقدرش اشكك في مركز المعلومات لان مركز المعلومات عمره ما حيكدب
لكن اللي خلى الفار يلعب في عبي ان النسبة فقط 84% سعداء
و من هنا اناشد مركز المعلومات بضرورة تحري الدقة
حيث ان النسبة مشكوك فيها
احنا عمرنا ما بناخد حاجة و تمانين % احنا اكيد حاجة و تسعين % كالعادة يعني

Wednesday, November 26, 2008

لو لم أكن متحرشاً لوددت أن اكون متحرشاً




بشـــــــــــــــــــــــــــــــــــــــــــــــــــــــــــــــــــــــرى


بمناسبة اقتراب الاعياد يعلن مركز المتحرشين الدولي عن البدء في دوراته التدريبية الجديدة للوقوف على احدث اساليب التحرش


هذا و يعلن المركز ايضاً عن بدأ التقديم في فصول المتحرش الصغير لتربية النشء


كما يزف المركز اليكم الدورات المتاحة بأسعار مخفضة
و اسعار خاصة للطلبة


اولا دورة كيف تتحرش و تطلع زي الشعرة من العجينة

ثانياً كيف تتحرش و تلبسها للمتحرش بها بمنتهى السهولة


ثالثا كيف تتحرش بمطربة بالرغم من وجود البادي جاردات


* تدريبات عملية في التحرش الجماعي و التحرش الفردي

* كيفية اختيار المكان المناسب و الوقت المناسب


للاشتراك
_______

ما عليك الا الاجابة على الاختبار البسيط الذي امامك
السؤال الاول
__________

ما السبب في تحرشات وسط البلد؟؟؟
  • دينا الرقاصة
  • البنات الاشرار
  • الفراغ




السؤال الثاني
___________

ما السبب في تحرشات العيد الصغير في جامعة الدول العربية؟؟؟؟

  • ان دينا الرقاصة مكنتش موجودة

  • البنات الوحشين

  • البنات الحلوين



السؤال الثالث
______________

ايه السبب في التحرش بالمطربة اما نعيمة؟؟؟


  • انها شبه دينا الرقاصة

  • انها مش شبة دينا الرقاصة

  • ان دينا الرقاصة مكنتش موجودة




السؤال الرابع
____________

ما هو شعارك في الحياة ؟؟؟؟



  • التحرش السليم في الجسم السليم

  • انا اتحرش اذاً انا موجود

  • انا لا اكذب و لكني اتحرش




شهادات معتمدة من اشد الابالسة شراً و شرار النفوس


  • دورات خاصة في كيفية الجري السريع و الهروب
  • محاضرين سوابق
مع تحيات المركز الدولي للتحرش بقيادة ابليس و الناس السلبيين

Monday, November 17, 2008

المرحومة اتجننت

مش عارفة بس حاسة بيها قووووووووووووووووووووووووووووووووووووووووووووووووووووووووي
شكلها حتستنى كتير
دة جنان دة و الا ايه
قومي يا بنتي شوفيلك تربة تلمك
خلاص ما عدش فيه
ضيعتي عمرك هدر
جتك خيبة حزم