جت الحزينة تفرح طلعت على المدرسة ارخص و اريح

في محاولة يائسة من ناظر احدى المدارس في المنصورة لتدبير بعض الموارد للمدرسة عشان يصلح بيها الفصول و الدكك المكسرة و الحمامات اللي ريحتها مغطية على كل الاكسجين و الحنفيات اللي مفتوحة 24 ساعة
قرر الناظر ان يؤجر حوش المدرسة كقاعة افراح باليل


و في تصريحات الناظر قال ان دة في اطار المشاركة المجتمعية للمدرسة مع المجتمع !!!
طبعا مدام كل مدرسة مكتوب عليها مدرستي نظيفة متطورة و منتجة
يبقىدة تطور

هو في اي دولة في العالم سبقتنا في التطور دة !!

طبعاً لا
و قال الناظر ان قاعة الافراح ( الحوش سابقاً ) بيتأجر ب 300 جنية في الفرح و بيطلع ايصال باستلام المبلغ
يعني 300 جنية / يوم × 30 يوم = 9000 جنية في الشهر
دة من حيث التطور

اما من حيث الانتاج فطبعا فيه انتاج
كل ما 2 يتجوزا في المدرسة حينتجوا عيال تروح المدرسة

المشكلة بقا ان تصرف الناظر معجبش وكيل الوزارة و ناوي له على نية سودا لسة مابانتش
قال موارد قال - احنا بتوع موراد بردو

اما رأي الناس بقا
فأجمعوا انهم مبسوطين و الفرح في المدرسة ارخص كتير من قاعات الافراح و مراكز الشباب

اما المعترضين فتحس انهم عبارة عن اصحاب قاعات الافراح اللي لقوا في هروب الناس الى حوش المدرسة قطع ارزاق
يااااااااااااااااااااااااااااااااااااااااااااااااااااااااااااااااااااااااة
مش قادرة اتخيل شكل المدارس الكئيبة و هي متحاطة بالفراشة و الكهارب

و جوة الحوش DJ , و رقاصة

و يمكن العروسة واخدة فصل بتلبس فيه و معاها الكوافير بتاعها زي ما بيعملوا في الفنادق

و العريس بقا جايب الحلاق بتاعو و قاعد يحلق في 3/1

و البدلة في 3/4
اما بقا الكوشة فمحطوطة في الاذاعة المدرسية على شكل كادر

و و البوفية محطوط في الكانتين
و اهل العريس قاعدين في فصول اعدادي
و اهل العروسة قاعدين في فصول ابتدائي
و يمكن العروسة و العريس يباتوا في 5/1 و بيعدين يسافروا شرم يقضوا شهر العسل
و المعازيم واقفين في الادوار بيتفرجوا و كبار السن قاعدين في الدكك
و النقطة نازلة من الادوار فوق على المعازيم و الناس اللي بترقص تحت

و مش بعيد المدرسين يشتغلوا في الفرح و يبقى ليهم اوفر تايم

بصراحة انا مش متخيلة ابدا بس كدة اكيد احسن من الشارع اللي بيسد الطريق و اهي المدرسة كدة كدة فاضية باليل
اذا كانت اساسا فاضية الصبح

و ان كانوا خايفين على العيال اهم كدة كدة مش بيروحوا المدارس بالرغم انهم بيحضروا كل الافراح في نطاق العيلة و الجيران و الصحاب و جيران الصحاب و اي صوت زغروطة يجروا يروحوا

و اساسا وجود المدارس بالاسعار دي حيعمل منافسة شريفة بين قاعات الافراح اللي بتتأجر بالالوفات بلا مبرر و يمكن ترخص كمان نتيجة فك حصار الاحتكار

بالرغم من خوفي ان الفصول تتأجر بعد كدة اوض مفروشة ماهي اساسا الطلبة مبقتش تروح مدارس و لو راحوا ما بيتعلموش حاجة لانهم اقتنعوا ان الدروس هي الامل الوحيد في النجاح
بس لن انكر اعجابي بتفكير الناظر المنتج حتى لو اختلف معه البعض في التطبيق الا انه قادر يخلق موارد بصورة عجيبة

و ارشحة يبقى وزير المالية بعد وزير المالية بتاعنا و نظراً لكفاءته الغير محدوده خدوه في صندوق النقد الدولي بالعند فينا و حرمونا منه الخوف بس قبل ما يروح صندوق النكد انه يعمل ضريبة ملاهي على المدارس