في خبر مستفز على موقع مصراوي يؤكد ان حكومتنا الذكية تدرس في سرية تامة عشان الحاجات دي بتتنظر مشروع خصخصة الاسعاف
يخصخصوا الاسعاف ليه يا ولاد و اساسا المفروض ان الاسعاف خدمة عامة لا تهدف للربح يعني مش بفلوس
يعني لازم يبقى حكومي زيه زي قسم البوليس
حتستفيد ايه الشركة الخاصة لما تشتري عربيات الاسعاف المرسيدس اللي عندنا دة احنا اساسا اغلب العربيات شاحتنها من اليابان دة غير اننا كاتبين عليهم كلمة الاسعاف بالمشقلب ( ف اـعسـلاا) بالعربي و و الانجليزي عشان السياحة
يا داهية سودا يكونش الاسعاف حيبقى بفلوس
تقف كدة حضرتك زي الشاطر و انت حاطط المريض بتاعك في كيس في الشارع و بدل ما تقول تاكـــــــــــــــــــــــــــــــــسي تقول اســــــــــــــــــــــــــعافسي ........... ( يرحمكم الله )
و الا يا حكومة الاسعاف الجديد حنطلبة بنمرة 0900
ليه كدة يا حكومة بس سيبتي ايه ببلاش دة حتة الهوا سمعت انه حيبقى بفلوس و اعتقد اني قريت ان فيه هوا حالياً معبأ في زجاجات خاصة للاخوة اللي مش عايزين الهوا دة بس الحمد لله لسة الازازة دي ماوصلتش مصر
و بعدين ازاي يا حكومة تعملي كدة على حسب باقي الخبر بردو انك صرفتي 800 مليون جنية لتطوير الاسعاف دفعناهم من لحمنا الحي من ضرايب و جبايات و اتاوات و معونة شتا بيدفعها احق الناس بالاعانة
و اسعار مبالغ فيها في كل شئ و الا انتي صرفتي ال800 مليون جنية عشان تحليها في عينين الشركة الخاصة الجديدة و تديهالهم بيضا مقشرة و الشركة تتعطف و تقبل العطا و تتنك على اهالينا بفلوسنا
و الا فاكراها زي الرصيف نهد الرصيف النهاردة عشان نركب ماسورة مجاري
و بعدين نرصفه و بعدين نهدة تاني عشان نعدل سلك التليفون
و بعدين نرصفه و بعدين نهده تالت عشان فيه ربع جنية مخروم وقع لما كانوا بيرصفوا الرصيف اول مرة
طب مهو كان ينفع في هدة واحدة نعمل الماسورة و نعدل السلك و نلاقي الربع جنية المخروم و بعدين نرصف رصفة واحدة
و كنتي تقدري بردو تبيعي الاسعاف من غير ال 800 مليون جنية تطوير
طب يا حكومة معاكي لحد الاخرليه منزلتيش مزايدة و الا مناقصة و لا حتى اعلان عطاء في الجرايد مش القانون بيقول كدة و الاعشان تكتمي على الخبر عشان الحسد ازاي حترسي العطا بالامر المباشر على شركة منعرفش عنها حاجة و تقولي مهي جنوب افريقيا عملت و احنا مالنا يا ستي بجنوب افريقا
طب مهي شمال افريقيا معملتش
و تشتغل الشركة بقا زي شركات الزبالة الاجنبية و مش بعيد نلاقي في فاتورة النور خانة مكتوب فيها رسم اسعاف جمب خانة الزبالة
مهي كل مصيبة نضيفها في فاتورة الكهربا و الا المرة دي ناوية تضيفها في وصل الغاز طبعا منتي حكومة ناصحة الغاز مش عند كل الناس لكن الكهربا غير
لكن بردو انتي ناصحة و ذكية و فضلتي تكبري في وصل الغاز لحد ما بقا ورقةA4 اكيد طبعا في اضافات جديدة حتتحط و انتي عاملاها مفاجأة
طب يا حكومة الاسعاف دة مش راكن في باركينج كدة و خلاص دي عربيات في مستشفيات و نقط و مراكز اسعاف يا ترى حتبيعهم كلهم شروة واحدة زي عمر افندي و الا حتبيعيهم بالقطعة طب كمان يا حكومة المسعفين و السواقين الموجودين دول حتطلعيهم معاش مبكر و الا حتجبريهم يشتغلوا في الاسعاف الجديدة و تديهم هدية فوق البيعة مع الـ800 مليون جنية تطوير طب يا حكومة الدول المتقدمة بعد الشر عننا بيدرسوا مشاريع الاسعاف الجوي السريع باستخدام الطيارات الهليكوبتر و انتي بتبيعي الاسعاف مش لما يبقى عندنا اسعاف اصلا يا حكومة دة اللي بيطلب الاسعاف الحكومي بيوصل قبل الاربعين بتاع المريض الله يرحمه بيومين يا حكومة الناس مش عايزة الاسعاف الجديد كفاية عليها القديم
يا حكومة بصراحة انتي اللي محتاجة اسعاف
No comments:
Post a Comment