تجري حالياً تحقيقات قوية على قدم و ساق وودن و مناخير للانتهاء من التحقيق في جريمة تسرب المازوت داخل مياة نهر النيل من الخط اللي بيغذي مصنع اسمنت حلوان سابقاً و يعذي سكان حلوان و القاهرة حالياً
بس للاسف بعد التسرب الحكومة استخسرت فينا المازوت بعد ما استطعمناه و حبيناه و حسينا بحلاوته و بتقول ان بقعة المازوت خلاص اتشالت
طبعا ما هو الوزير راح بنفسه في عز الحر و القيالة و قعد يسقف للعمال وهما واقفين في المية بيلموا المازوت من على وش المية
و الا تكونوش فاكرين اننا عندنا شباك و سدود و مواد خاصة بمعالجة و استخلاص البقع الزيتية لالالالالالالالالا اصحوا فوقوا الكلام دة مش هنا يا باشاوات و انتوا قاعدين و لا على بالكوا
معالجة البقعة تمت بنشارة الخشب و قش الرز و شوية عمال كده غلابة واقفين حاففين في الميه
يااااااااااااااااااااااه يا شعب قدماء المصريين قدسوا النيل دة و كانوا بيعتبروه رمز للنماء و الرخاء و كان كل حياتهم و احنا بنحمي فيه الحمير و بنحط فيه مواسير كارتون تنيلو اكتر و اكتر
و اساسا هو ايه اللي ممشي ماسورة المازوت في النيل من الاصل لا و ايه كمان دي مش حتة ماسورة لقيطة و تايهة كدة لا خالص دة خط مواسير بحاله
يكونش النيل بيفرز مازوت فزرعوا فيه ماسورة توصل للمصنع مباشرة عشان التكاليف و العين البصاصة
او يمكن الصرف الصحي في النيل بينتج مازوت او يمكن بردو استحمام المواشي و غسيل المواعين بيؤدي لاستخلاص المازوت في تفاعل كيميائي بين نهر النيل و الانتاج الغزير من مجاري و حموم و خلافه
هو يا اخوانا مش المازوت دة اللي بمناسبة السنة الجديدة الحكومة رفعت سعره 100% من 500 جنية للطن الى 1000 جنية للطن و خلى الدنيا ولعت لما غلى الطوب و الاسمنت و الورق و كل الصناعات
يبقى نسيب ماسورة كدة عندها تسرب لا ارادي تسرسب في النيل من مازوتنا المصون ازاي
و يا ترى الزحام اللي على النيل اليومين دول سببه ان الناس راحه تتفرج على البقعة و الا تشم هوا و الا كل واحد جايب معاه جيركن و بيعبي مازوت
طب سؤال
المية اساسا خليط من المية و الكلور و المازوت غير اضافات الصرف الصحي و الغسيل فاوجد المركب الكيميائي الذي نشربه ؟؟
( (سؤال تعجيزي ممكن يجي في الثانوية العامة في امتحان الكيميا اصلها غدارة )))
طب سؤال تاني
افرض ماكونتش بتشرب من النيل بس بعد ما سمعت اغنية شيرين <ما شربتش من نيلها > خدتك الحماسة و شربتلك جالونين مازوت بالميةو بعد ما يصيبك نصيبك يا ترى حترفع قضية ضد شيرين و الا ضد المؤلف و الا حتفوض امرك لله ؟
((سؤال تعجيزي من امتحانات ليسانس حقوق ))
و يا ترى بعد ما سكان حلوان و القاهرة الكبرى بلبعوا المازوت و خلافه حيتسجل في الفاتورة ازاي
هل يتسجل في الفاتورة على انه مصاريف نثرية و الا ضريبة و و الا اضافات خاصة زي بتاعت البيتزا
البلد اليومين دول شّدة حيلها علينا اوي في موضوع العيال و كل واحد لازم يكون مخلف اتنين بس و الزيادة السكانية بتلتهم التنمية و انتوا قاعدين تخلفوا و لا على بالكم فاحتمال بردو يكون المازوت دة وسيلة لقطع الخلف على اساس انه سُميات و مواد بترولية شربها بيجيب الفشل الكلوي و ممكن يكون وسيلة مفيدة لمنع الحمل مع ان الناس قطعت الخلف اساساً من الضرايب و الاسعار و الحكومة الذكية و القرارات الرهيبة
و احتمال بردو ان الحكومة بعتت لنا المازوت في بيوتنا رغم ارتفاع اسعاره مكافئة لينا على صبرنا الايوبي و هي واثقة تماما اننا حنعرف قيمته و مش حنستحمى بيه و كل ست بيت ناصحة أوحتى بتفك الخط عارفة قيمة زيت المازوت و حتقلي فيه بطاطس شيبسي و تحمر فيه فراخ من ام انفلوانزا
و ينافس بقا زيت عباد الشمس و زيت الدرة بلا كلام فارغ
و احتمال بردو ان الحكومة بعتت لنا المازوت في بيوتنا رغم ارتفاع اسعاره مكافئة لينا على صبرنا الايوبي و هي واثقة تماما اننا حنعرف قيمته و مش حنستحمى بيه و كل ست بيت ناصحة أوحتى بتفك الخط عارفة قيمة زيت المازوت و حتقلي فيه بطاطس شيبسي و تحمر فيه فراخ من ام انفلوانزا
و ينافس بقا زيت عباد الشمس و زيت الدرة بلا كلام فارغ
و نصعد لمرحلة اخرى من الرفاهية المفرطة اللي بنعشها في ايام سعدنا دي
و بعد ما زهقنا من شرب مية المجاري نشرب مازوت بقا و نفوق لنفسنا و نروق كدة
خصوصاً ان الحكومة الحمد لله مطمنانا على الاخر و كل شوية تقول ان المياه امنة امنة امنه
وواضح ان امنه دي هي اللي سربت المازوت
اه صحيح نسيت اقولكم ان المازوت دة سلعة مدعمة و جايز يكون التسريب حصل بالقصد كنوع من وصول الدعم لمستحقيه لان الغير مستحقين للدعم بيشربوا ميه معدنية ( طلعت اساسا مصدية لا معدنية و لا خيبة/ راجع تقرير حماية المستهلك )
اه صحيح نسيت اقولكم ان المازوت دة سلعة مدعمة و جايز يكون التسريب حصل بالقصد كنوع من وصول الدعم لمستحقيه لان الغير مستحقين للدعم بيشربوا ميه معدنية ( طلعت اساسا مصدية لا معدنية و لا خيبة/ راجع تقرير حماية المستهلك )
طب بعد التسرب دة حيفضل اسمه نهر النيل و الا حنسمية نهر النيلة واهو كله هباب
و الله امنت يا شعب مصر ان المصري اما يموت محروق او غرقان أو مسموم أو متسرطن و لو منفعش كل دة بعد الجهود المبذولة دي كلها هو حينتحر و يخلص نفسه بقا بلا هم الناس عملت اللي عليها و زيادة و انتوا مكلبشين فيها
حقوق النقل و الاقتباس غير محفوظة و انت و ضميرك
و الله امنت يا شعب مصر ان المصري اما يموت محروق او غرقان أو مسموم أو متسرطن و لو منفعش كل دة بعد الجهود المبذولة دي كلها هو حينتحر و يخلص نفسه بقا بلا هم الناس عملت اللي عليها و زيادة و انتوا مكلبشين فيها
حقوق النقل و الاقتباس غير محفوظة و انت و ضميرك
اصل بسم الله ماشاء الله المواضيع مسروقة في مليون منتدى
