لو جدع قول للغلط لأ

طلعتلنا الحكومة في مقدر جديد متمثل في وزراة النقل و المواصلات و بالذات السكك الحديد في طوفان من الاعلانات
يعني ايش معنى الضرايب و عبد القوي ابو نوتة بمبي بسوستة
حملة عجيبة جدا
متمثلة في مجموعتين

المجموعة الاولى عبارة عن اعلانات تحفة اكتشفت ان القطارات هي افضل وسيلة مواصلات في الكون
واحد قاعد مع مراته و الا معرفش مين في مكان شيك و لسة ما شربتش العصير
و بيقولها يلا بقى نقوم نمشي عشان انا مسافر بكرة و حتفعص في ا( الميكروباز)
لا و ايه المسافة بينه و بين كتف اللي جمبة مش عارفة كام سم

ولد تاني قاعد على البحر مع اصحابة بيشكي همه و يقولهم انه وشه لزق في رجله من الشنط اللي كانت في عربيتهم الملاكي
فلو سافر بالقطر كان لعب في مراجيح السبتية اللي في القطر و مكنش اتبهدل في عربيتهم و دة يا عيني المسافة بين رجه ووشه سالب كذا سم

واحدة مسافرة في الاتوبيس و روكبها يا عيني حتخرج من الكرسي اللي قدامها
فلو سافرت بالقطر كانت مدت رجليها و ارتاحت

و دي كانت المجموعة الاولى اللي كان ناقص تقول فيها ان الاستاذ محسن الفنجري رجل الاعمال الشهير مسافر بيمضي عقد في لندن لكن لان الطيران مخيف و المسافة بينه و بين اللي جمبة كبيرة فركب القطر عشان الونس

او مثلا
كايل اكس واي و هو جاي في مركبته الفضائية كان مخنوق لان الاشكال فيها ما تسرش القلب فلو جه من المريخ بالقطر كان شاف المناظر اللي تشرح القلب الحزين

معرفش بيجيبوا الافكار دي منين
هي الناس لحقت تنسى حريقة القطر
و الا الست اللي وقعت من ارضية حمام القطر !!

الحملة التانية بقى و هي فاكهة رمضان
المصري اللي على حق يقول للغلط لأ

وزارة المواصلات خلاص رمت طوبتنا و مننا فينا بقى نتصرف
يا جماعة القطارات الجديدة دي بتاعتكم
شايف الواد دة اللي بيغز الكرسي بتاع القطر الكرسي دة بتاعك يا رأفت
و مصر امانة في ايديك

و الا الست دي اللي يتقلي بتنجان و طعمية في نص القطر
الطعمية دي بتاعتك يامحسن بية و سمعني سلام رأفت الهجان

و الا الولد اللي بيخربش في الشباك
و الا اللي جايب صاحبه و يسطح فوق القطر
و الا الحرامي اللي سرق حنفيتك يا مغفل
لالالالالالالالالالالالالالالالالالالالا
انت المسئول و خلاص حنعينك مخبر للوزراة
احنا خلاص مالناش دعوة القطارات الجديدة دي بتاعتكم و بفلوسكم
يبقى تاخدوا بالكم منها و تفضلوا تلألأوا طول النهار
لان المصري معروف بقوته و جبروته (ووثيق) من الفوز
لما كنا احنا المسئولين القطارات كانت بتولع و بتتقلب و الحواداث كانت متلتلة
فاحنا خلاص شيلنا ادينا و انت المسئول اهو و طلعنهالك في التليفزيون وورينا شطارتك

لا بقى معلش يا حكومة
انا مقدرش اقول لواحد ماسك مطوة و بيخرم في الكرسي لا
ما يمكن يغزني انا
فين العساكر بتوعك
فين الشرطة
فين المخبرين
فين الرقابة
مش معنى انك خدتي فلوسنا و جبتي بيها قطرين جداد و بباقي الفلوس عملتي حملة بملايين الجنيهات ان انا اللي اتصدى للبلطجي اللي معاه مطوة و الا الست اللي ممكن تحدفني بالباجور
الحملة دي المفروض متعملهاش وزارة المواصلات
الحملة دي تبقى حمله للتوعية و تعليم الادب و الذوق للناس


بس بصراحة اغرب حاجة في الحملة دي ان الحكومة باقلها سنين بتعلمنا تقول نـــــــــــــــــعم
و المرة دي بتعلمنا نقول لأ
فمش بعيد الحملة الجاية تخلينا نقول ( كفاية
ههه كل شيء جايز

مزاج حكومي مدعم

قاعدة بتفرج على التليفزيون في امانة الله
على الحياة اليوم الاقيهم بيقولوا
وزارة الزراعة تتحفظ على ١٣ ألف طن ذرة لاحتوائها على بذور «القنب» لإنتاج مخدر «الحشيش» كانت مستورداهم من اوكرانيا
اقلب على معتز 90دقيقة
الاقيه بيقول نفس الكلام
معقول!!!
طب و يا ترى ال 13الف طن دول فيهم كام طن قنب و كام طن درة
يعني هل هي قسمة العدل
طبعا تغلبت على شيطاني و قولت اكيد ان الحكومة جايبة الدرة دة و حتعمل بيه اكل مدعم
و تنافس تجار الحشيش الجشعين بعد توزيعها للحشيش المدعم
او يمكن بتساعد الشعب يعمل دماغ عشان لما يضرب دماغه في الحيط ما يحسش بحاجة
الغريب ان اوكرانيا بتزرع درة او قمح لدرجة ان علمها نصه اصفر رمز للقمح و نصه ازرق مش عارفة رمز لاية لكن مش اكيد الحشيش لان الحشيش على ما اعتقد مش ازرق
لكن الغريب انها مش مشهورة بزراعة الحشيش
يعني لو الشحنة دي جاية من افغانستان مثلا اقول ايوة فيها حشيش و افيون كمان
لكن ايه اللي جاب بذور الحشيش في بذور الدرة الى اوكرانيا
هل هي طريقة تهريب جديدة للمخدرات
طب و بعد الدرة ما بقت محششة
العيال اللي بيشوا درة في الشارع حيشوه عيني عينك كدة و الا شوي الدرة حيبقى في الغرز و القهاوي و اماكن التعاطي
هل ممكن البوليس يقبض على واحد بياخد حقنة درة !!
او بيشم دقيق درة
هل الدرة حتضاف لجدول المخدرات
اسئلة لازم نعرف اجابتها قبل ما نقدم على ادمان الدرة
بس بردو لازم نشكر الحكومة لانها بعد ما جابت القمح المسمم جابت الدرة اللي حيخلينا
نعمل دماغ و نبطل صداع
المشكلة بس بجد اني ابتديت اقلق علينا
بعد ما نموت من الحاجات دي
الكُناسة بتاعت الدول دي حتترمي فين

اوباما زكي جمعة قلب الاسد

اختلفت الاراء في موضوع زيارة اوباما لمصر
فمنهم اللي معارض و خلاص و نظام خلقنا نعترض و قال ايه عايزين ينظموا وقفة احتجاجية في احد الميادين العامة اثناء الزيارة
قال يعني دة ينفع
دة مش بعيد ياخدوا الراجل من برة برة على شرم الشيخ عشان ميشوفش مناظرنا اللي تكسف
و دة حيكون احسن لينا
دة احنا لما وزير يكون مروح البلد بتتقفل من الضهر لحد ما يوصل بيتهم و يغير و يتغدى و يريح شويه نقوم احنا نوصل بيوتنا على ميعاد المسلسل العربي
فما بالكم بقا من لما يبقى الحاج اوباما
دة مش بعيد يتفرض حظر التجول

و منهم اللي فرحان و كأن اوباما جاي يخطب من مصر مش يخطب في مصر
بالرغم يعني ان مصر مكنش مطروحة و الاختيارات كانت ما بين تركيا و اندونسيا
و بالفعل هو زار تركيا الاول و بعدين الحمد لله حصلت حاجة خفية خليتهم افتكروا ان مخاطبة العالم الاسلامي لازم تكون من مصر لانها قلب العالم مش عشان يعني انها بلد الازهر الشريف
و عموما اياً كان السبب
اذا كان السبب الافراج عن ايمن نور و الا حتى ان اوباما شاف الحسين في المنام و جاي يلبي
و الا جتله زيارة من البلد فيها فطير و بط و جاي يرد الزيارة و يرجع السبت
المهم اننا امام زيارة مهمة جداً مفيش ادامنا فيها غير اننا نقف على عتبة الدار و نقوله يادي النور يا دي النور بيتك و مطرحك
بالرغم اني خايفة يكون جاي يعاين المنطقة اصل امريكا دي مالهاش امان
و خصوصا ان الراجل دة فيه كذا مشكلة
اولا اسمه ( باراك ) و الاسم دة اساساً شؤم و تحس ان ريحته وحشة و متعاص يهود او حاجة كدة حتبرك على صدرك
ثانيا هو الرئيس رقم اربعة و اربعين
و احنا عارفين ايه هي عيلة اربعة و اربعين
ثالثا اتحدد ميعاد الزيارة يوم اربعة يونية و دي ليلة رأس السنة بتاعت النكسة و الله اعلم صدفة و الا من بختنا المايل
ثالثاً الراجل دة سياسي محنك و و سوسة مبتهج كدة عمال على بطال
و تحس انه متباسط كدة و مش بعيد يكون بيشتري لبسه من wekalet ELBALHبتاعت امريكا


المهم ان الراجل جاي ان شاء الله
حيعمل ايه محدش عارف
الخطاب دة حنستفيد منه ايه الله اعلم
المهم ان المتفائلين تفائلهم زاد و محسسني ان اوباما دة قريبهم اللي جاي من الخليج شايل و محمل هدايا و حيلف بيها على المصريين
و مش بعيد يقرص عى الحكومة و يخليهم يوزعوا جبنة نستو على العيش المسرطن

طب تركيا على الاقل استفادت وعد منه انها حتنضم للاتحاد الاوربي
لكن احنا حنستفيد ايه
يمكن يخلي مصر سنتنضم للاتحاد الاوربي هي كمان
بصراحة انا لا متفائلة و لا متشائمة لكن انا شايفة ان الرجل دة المفروض يلف على كعابه كل الدول عشان يحسن صورة امريكا اللي اتبهدلت بسبب سياسات القرد بوش و شركاه و تحسين صورة امريكا امام العالم

البطاقة لاتزال في جيبي

لم اتفاجأ ابدا بصدور القرار الفجائي بإلزام المواطنين بتغيير بطاقة الرقم القومي
بالرغم من انه في أول صدورها كانوا قايلين انهم حيصنعوها من الفولاذ عشان متصديش في جيبك و تعيش العمر كله
و كل الناس طلعت قرشين من تحت البلاطة و اشترت الحافظات البلاستيكية للحفاظ على البطاقة الابدية
هذه البطاقة الابدية فجأة قالوالالالالالالالالالالالالالالالالالالالالالالالالالالا يمكن
الغازية لازم ترحل و البطاقة لازم تتغير و أي مواطن بطاقته عدى عليها 7 سنين لازم تتغير حالا و فوراً لانها حتكون غير صالحة
و انت يا مواطن منك له حتكون اكسبايرد و بطاقتك مش حتنفع في أي تعاملات حتى لو كنت متاخد تحري و الا حتى عجوز و مسن و بتقبض معاشك و انت مسندينك

كدة يا حكومة فجأة
ايون هو كدة و اللي مش عاجبه يضرب دماغه في الحيط
و طبعاً اذا عرف العجب جه شعبان في رجب
لازم نكون متأكدين ان الحكاية دي سبوبة جامدة جدا حتلم فلوس بالهبل و سبحان الله للداخلية بردو ( غرامات مرورية + تجديدات بطاقية )
حنفترض جدلاً ان من 80 مليون مواطن فيه 10 مليون بس لازم يجددوا البطاقة ( على ما اعتقد الناس ابتدت تعمل البطاقة الجديدة من سنة

1997 )

يبقى 10مليون × 15 جنية تمن الاستمارة = 150 مليون جنية مشفيين كل شهر تقريبا ( طبيعي لان اللي مش مجدد الشهر دة مجدد اللي

بعده ) و الله اعلم فيه أي اضافات تانية و الا لاغير كمان ان بيقولوا ان الناس اللي مش عايزين يروحوا حنبعتلهم موظفين برسم 75 جنيةو بكدة الحنفية تفضل سايبة و تنزل في ميه العمر كله
دة لو يعني الواحد ربنا طول في عمرة و جدد تاني
و الحكومة الذكية ممكن كمان شوية تقرر ان التغيير يكون بعد سنة و بعدين كل 6 شهور و بعدين كل 3 و اتعملت قبل كدة في فاتورة التليفون و كله في مصلحتك يا مواطن يا خايب يللي مش عارف مصلحتك

و الله انا مش معترضة على التغيير و مش من الناس اللي خُلقنا لنعترض

انا معترضة على الفرضية بس

المفروض مثلا البطاقة تتغير لو طرأ تجديدات معينة زي الحالة الاجتماعية مثلا او العنوان
لكن بقا اغير البطاقة عشان مفيش حاجة اتغيرت و عشان هو فرض عين و خلاص يبقى الحكاية فيها ان

فيه ناس عاملة البطاقة من سنة 99 زي حالاتي كدة و الناس دي صحيت فجأة سنة 2009 لقت البطاقة بتاعتها منتهية من سنة 2005 و كأنها كانت عايشة مع اهل الكهف لا و ايه كمان عليها غرامات 200 جنية على حد قول احدى الجرائد

بس الحكومة الحمد لله ادت مهلة 3 شهور من بعد ال 7 سنين

يعني كان عندي اخر مهلة في سنة 2005 بردو يعني مهلتي خلصت من 4 سنين كدة و عليكم خير

طب ليه كدة هل هو شره جمع المال اللي بقا عند الحكومة والا الحكومة قالت احنا كدة كدة مكروهين فنعمل فيهم فصل يحرق دمهم و خلاص

انا عن نفسي اعتقد ان الحكومة اشتاقت لطابور جديد بعد عزوف المواطنين على الوقوف في طابور العيش بعد فصل الإنتاج عن التوزيع

بس لو الحكومة بقا عايزة تلم فلوس بجد ففيه افكار اجمد من كدة بمراحل

و دي مجموعة حلول ابتكارية اقوى من بتوعها

اولاً

يعني مثلا تفرض تجديد البطاقة لو كنت بشنب و حلقت شنبك حتى لو كنت عامل بطاقتك امبارح
تغير بطاقتك لو قصيت شعرك او حلقت دقنك

تتغير البطاقات للاناث لو كانت مش محجبة و اتحجبت او كانت بشعر و من اللي بتشوفة اقرعت

تتغير البطاقة للإناث و الذكور لو من الجوع و القهر وشهم اصفر و جالهم أنيميا

تتغير البطاقة لو شيليت الكالو اللي في صوابعك

تتغير البطاقة لو استحميتو كدة

ثانياً

حل تاني يجيب فلوس بردو انك تحط بياناتك على و بكدة تقدر تجمع اكبر قدر من البيانات و كمان يقيسوا مستوى المعيشة لان في الفلاشة حتقدر تخزن اكلت ايه امبارح و صيفت فين السنة اللي فاتت و خرجت مع اصحابك امتى و بتشجع الاهلي و الا الزمالك و كل انتماءاتك السياسية و الدينية و الفكرية و دة كله يوم بيوم Up dated و أي حد حيحط بيانات غلط حيدفع غرامة و كمان تضيف بيانات مهمة جدا كانت موجودة في البطاقة القديمة و اغفلتها البطاقة الذكية زي مثلا فصيلة الدم بس طبعا احنا عارفين البطاقة الذكية اغفلتها ليه

عشان لو لا قدر الله حصلك مكروة يدوك دم من أي فصيلة تانية و انت و حظك يا تعيش يا تتوكل على الله و تموت شهيد

بيان تاني مهم و مش موجود في البطاقة الذكية اللي هو البصمة رغم من وجهة نظري البيان دة مهم جدا يكاد يكون في اهمية الاسم فبوجوده تقدر الداخلية يبقى عندها داتا لكل بصمات البالغين في البلد
مع الاخذ في الاعتبار ان الفلاشة عليها الاستيكرز اللي بيلمع اللي موجود في البطاقة عشان التزوير

ثالثاً

بما ان الحكاية تبع الداخلية بردو و في بيتها يبقى يتعمل حملات مرورية على اللي ماشيين على رجليهم و فاكرين خلاص يا ارض اتهدي ما عليكي ادي و قاعدين يتفرجوا على الغلابة اللي سايقين عربيات من غير شنطة الدكتور و هما بيدفعوا غرامات

دول بقا يتخصصلهم كمائن مرورية تشوف بطايقهم و تتأكد ان ضوافرهم نضيفة و انهم غسلوا سنانهم الصبح و انهم مسرحين شعرهم و الرجالة حالقة دقنها و حاطه after shave و الستات طابخين في بيوتهم و مريحين اجوازهم و غاسلين المواعين الصبح قبل ما ينزلوا و طبعا قبل دة كله ان بطايقهم متجددة و لسة ما عفنتش و طلع عليها فطر بني اللي بيطلع كل 7 سنين دة

و في النهاية احب اقول للحكومة الحبيبة كلمتين

:- الغاوي ينقط بطاقيته عايزة تغيري البطاقة غيريها مجاناً و من غير فرضية او برسوم بسيطة جداً

2- ارشح ليكي اتنين يسدوا في كل المواقع و هم الاستاذ على علوكة و الاستاذ اشرف كُخة

و الله ولي التوفيق

CSI معادي

كوم امــبو * كوم امبو* مع المفتش كوم امبوووووووووو


انهاردة عندنا جريمة كبيرة جريمة غير عااااااااادية

حيرت عقول الشرطة ســـــــــــــــــــــــنتين بحالهم من اخر 2006 و لحد اول 2009 و لان الشرطة مكنتش فاضية للجرايم الهبلة العبيطة دي و تفرغت للقبض على عتاة الاجرام و عمل اكمنة لكل من تسول له نفسه و يسوق من غير حزام او يسيب شنطة الدكتور في البيت او ما يلبس المثلث في رقبته

فقررت الشرطة الاستعانة بيا انا و و حسين بومب
المتهم بتاع النهاردة هو رأس الافعى في قضية ريا و سكينة
هو حفيد آل كابوني
هو الابن الروحي لسفاح كرموز
هو السفاح و الموز و البرتقال

حلقة النهاردة غير كل الحلقات حلقة النهاردة احنا خلاص قبضنا على المتهم وريحانكم من عم شنكليح بتاع المراجيح
و جايبين المتهم عشان بس تتفرجوا عليه
و تعرفوا احنا قبضنا عليه ازاي

شوفوا الحكاية
جالنا رنة على النوبايل بتاع حسين بومب ان فيه واد شكلة مش ولابد واقف في مدخل العمارة
فروحنا جرررررررررررررري و اول ما شوفناه قولنا في نفس واحد ان السحنة دي شبة الصورة التخيلية اللي رسمتها الشرطة للسفاح بناء على اوصاف الضحايا من سنتين و طبعا الصورة لزقت في مخنا بأمير مصنوع في اليابان و بالرغم من مرور سنتين على الصورة و اول ما لمحناه صرخنا في نفس واحد
حااااااااااااااااااوط يالالالالالالالالالالالالالالالالالالالالالا دة باين انه السفاااااااااااااااح
و جررجناه على القسم
فالواد لقى نفسه متهم في تهمة خايبة اللي هي انه جاي يسرق شقة و لما لقى ان التهمة أي كلام و متشرفش أي مجرم سنكوح و مش على المستوى قرر يعترف بجريمته الاصلية و اعترف انه في سنة 2006 ( باليوم و التاريخ بالرغم من مرور سنتين ) انه اعتدى على 11 فتاة بسلاح حاد نتيجة اصابته بمرض نفسي لانه في السنة اللي اتخوزق فيها سليمان الحلبي كان بيتفرج و مقدرش يستحمل المنظر فجالته ازمة نفسية
لكن بالرغم من اعتزاله سنتين الا اننا قررنا نقبض عليه
مش عشان اعتزل لا سمح الله لكن لان الجِريمة لا تفيد و لان المفتش كوم امبو ميقدرش ينام و فيه مواطن لسة مدخلش سريرة و استغطى
المفتش كوم امبو لو حط حد في دماغة بيجيبه حتى لو كان ممدوح اسماعيل و هو بيستوق في هارودز

المفتش كوم امبو مستغرب من حاجة واحدة بس هو الواد دة سموه سفاح ليه بالرغم انه مقتلش حد في حين ان هباب اسماعيل اتسبب في قتل اكتر من 1000 و لسة بيتذكر باسمه بدون القاب سفاحية و يمكن كمان بيقولوا عليه الاستاذ

الواد المجرم دة امه و اخته و اهله و جيرانه بقوا شايلين اللقب معاه
اخت السفاح راحت اخت السفاح جت انا حتقدم لاخت السفاح يوم الخميس
و انا جار السفاح و ماشابه
في حين ان البلاوي التانيين بتوع المبيدات المسرطنة مفيهمش ولا واحد حامل راية سفاح و اساسا كلهم راحوا في زيارة عائلية للعيلة الملكة في بريطانيا لان في في نسب بينهم
لو معرفتش الحل اتصا ب 05000000085000000
و حمل اغنية سفاح و ماشي في البلاد سفاح و لو مفيش يبقى اغنية سيد الحنانا يا حنانا ننتا