الزبالة للجميع

زبــــــــــــــــــــــــــــــــــــــــــــــــــالة

لا مش شتيمة
دة اقوى انتاج قومي
شوف انت لما شعب كيانة 75نسمة على الاقل و كلة بينتج زبالة حتى الاطفال المولودين يبقا الناتج القومي اد ايه

تاريخ الزبالة في مصر يرجع لعهد الاسرات او يمكن للديناصورات مهو اكيد طول ما فية بشر يبقا فيه زبالة
ارتباط البشر بالزبالة ارتباط وثيق ماشاء الله

مش عارفة ليه الناس في مصر معتقدة ان الشارع ما هو الا تكبير لصفيحة الزبالة ولو في ايدك ايه ارمية في الشارع حتى لو عيل صغير و عايز تخلص منه ترميه في الشارع ولو مش مصدق افتح صفحة الحوادث و شوف كام عيل كل كام يوم يلاقيهم مرمين في الزبالة
واحدة ست قتلت جوزها و قطعته حتت و حطته في اكياس زبالة و رمته في الشارع بردو
سيبك من الجزء الاسود انها قطعت جوزها بص للجزء الأبيض انها حطته في أكياس زبالة - منتهى النظام !!! عارفة المكان الصح

و لو واحد ضميره انبه و حس ان الشارع المفروض ميبقاش مزبلة كدة و قال يحط الورقة اللي في ايدة في جيبة مثلا لحد ما يلاقي صندوق زبالة تبص تلاقي واحد من شياطين الانس من اللي معاه او يمكن هو بس ضميره جاله إغماءة مفاجأة يقول ايه الهبل دة ما كل الناس بترمي و يروح رامي على اعتبار انها موضة
و ان الشارع جزء من الزبالة و الزبالة جزء من الشارع و مينفعش جزء فيهم يختفي عشان مانتوهش

حتى الناس بقا عندها انتماء للزبالة
ممكن جداً تلاقي واحد بيوصف لحد العنوان اللي هو مستنية فيه و بيقوله اول شارع فلان الفلاني كوم الزبالة الاولاني لا و التاني لا تحود شمال جمب كوم الزبالة التالت حتلاقيني واقف مستنيك جمب كوم الزبالة اللي جمب السوبر ماركت و يمكن كمان يجي علينا اليوم اللي نسمع فيه عن رحلة مدرسية لزيارة كوم اثري من الزبالة

كتير بحس ان الناس بتزبل الشارع بالعند في الحكومة

مهي الحكومة فرضت علينا اتاوة احم قصدي رسوم زبالة ههههههه ( دة وصف مش تعريف ) مقابل الزبالة
فالناس بقت ترمي في الشارع مهي دافعة دافعة من منطلق حكمة شمشون الجبار عليا و على أعدائي يا رب

صحيح نسيت اقولكم
اول لما اتحط الصناديق الشيك دي بتاعت الزبالة اللي في الشارع كانوا حاطين صندوق تقريبا لكل 5 عماير
و انتوا طبعا عارفين انتاج المصريين في الموضوع دة عامل ازاي
فطبعا الصناديق دي مكنتش بتكفي و الناس كانت بتعترض ان الصناديق بعيدة عن العماير و مش معقول يعني الباشا و هو نازل الشغل الصبح يمسك اللاب توب بأيد و كيس الزبالة بأيد عشان يرميه في الصندوق البعيد و اساساً مليان زبالة
فاللي بالي بالك قالوا ايه
قال ايه كان فيه صناديق كتير بس الناس سرقت صناديق الزبالة دي عشان بعجل و عملتها تلاجات لبيع الحاجة الساقعة

و متفهمش ليه جابولنا اصلا شركات الزبالة الاجنبية دي
دي ملت الشوارع زبالة و خلت الزبالين كمان يكبوها و يقلبوا فيها و يوسخوا الشارع بزيادة

كنت بتفرج من يومين على فيلم أجنبي و البطل و البطلة واقفين جمبهم صندوق زبالة من بتاع عمدان النور مكتوب عليه اونيكس زي اونيكس بتاعتنا اللي في اسكندرية فسألت نفسي اومال اللي عندنا تقرف ليه دي اللي عندهم لو اتحط فيها مية حتتعقم

و متفهمش بقا هو احنا اللي مش منضفين الصناديق بتاعتنا و الا الشركة هي اللي مستهونة بينا
و الا دة جزء من مشروع الزبالة الذكية و دي غير الزبالة الالكترونية
اصل الزبالة الالكترونية دي عظمة على عظمة و لو عندنا في مصر كنا ظبطنا الدنيا اخر تظبيط
عبارة عن الاجهزة الكهربائية القديمة و التليفونات و الحاجات دي يعني اللي بتستغنى عنهم الدول الغنية و ترميهم في صناديق الزبالة الكبيرة اللي هي بعض الدول الفقيرة الغلبانة بدون غيبة و ذكر اسماء

طيب و العمل في اكوام الزبالة اللي بتنتشر دي
دة فيه اكوام قربت تنافس الهرم الاكبر
نعمل ايه

نعمل وزارة للزبالة و يبقا عندنا وزير الزبالة
مش حينفع بردو محنا عندنا وزراة اقتصاد و معندناش اقتصاد

نقتل الناس عشان تبطل ترمي زبالة – مش حنقدر عليهم كلهم ما احنا جربنا نقتلهم بمليون طريقة مماتوش ايشي عبارات ايشي قطورات ايشي هجرة غير شرعية ايشي ارتفاع اسعار و مبقوش لاقيين اللقمة ايشي صخور من فوق الجبال و بردو مفيش فايدة

طيب نفتح خرم في الهرم من فوق و نعمله مقلب عمومي مش حيقضي بردو

طب و العمل دي الزبالة بقت كتير اوي و بقا كوم لكل مواطن

انا خايفة مصر اسمها يتغير في يوم من ارض الكنانة الى ارض القمامة