ابســـــــــــــــــــلوتلي احنا اللي اثرنا في الازمة

عزيزي المواطن من حقك ان تفتخر و تطلع لناسك لدول العالم كله

خلاص نحن نحصد نتاج صبرنا الايوبي

فقد اثمرت حملات احسبها صح تعيشها صح نتائجها المتوقعة و نفدنا بجلدنا من الازمات الاقتصادية

و الحمد لله الازمة اثرت في كل البلاد لكن احنا لا

ابسلوتلي احنا اللي اثرنا على الازمة و لو مش مصدقني اسأل أي حد حيقولك اننا بعيد كل البعد عن التأثر بالازمة

بعيد ليه يا عم هو احنا معندناش اقتصاد و كنتم عاملنها مفاجأة عشان يوم زي دة

و الا حجاب ام سيد شغال و عامل مفعول

ما احنا دولة وسط الدول نتأثر باللي بيجرى فيه و أتأثرنا عادي لما السلع الغذائية غليت على مستوى العالم و غلينا كل حاجة غذائية و غير غذائية على حس الارتفاع العالمي

و بقى كل واحد يطلع يقول اصل الدنيا غليت – اصل الدولار علي – اصل علينا نذر نغلى زيهم

اصل المحاصيل بيصنعوا منها وقود حيوي

و قصص كتير و احنا لا بنصنع وقود حيوي و لا حتى فوانيس وحوي يا وحوي

لكن أتأثرنا

نيجي بقا في الازمة الرهيبة اللي حتسبب ركود و اللي المفروض بالتبعية يخفض الاسعار و نقول كخة !!!

لا ماخدوش يا بابا ماخدوش يابابا

احنا مالناش دعوة بالازمة الوحشة دي و متأثرناش بيها

اذا كان انتاج الافيون في افغانستان اتأثر و دة مش كلام نرمو و لا اشرار الموساد دة كلام واشنطن اللي اكدت ان انتاج محصول الخشاش و تصنيع الافيون تاثر جامد جدا بالرغم من تحقيقه سابقاً مستويات مرتفعة في الاعوام السابقة

طب يا ترى احنا حنعمل ايه في ازمة الخشخاش دي و حنواجه الازمة ازاي

متخافوش احنا حاسبنها صح فحنعيشها صح

احنا حناخد من اللي تحت الحوض

اننا لا نتأثر بالازمة الاقتصادية دة احنا اللي اثرنا في الازمة و خلي الدماغ صاحي

هل فعلا اننا لا نتأثر بانهيارات البورصات العالمية و كل معلوماتنا عن البورصة انها مراة البورص !!!

هل اننا في اثناء انهيار البورصات العالمية احنا القاشية عندنا معدن و فل الفل بايسين ايدنا شعر و دقن و كل مشكلتنا مين قتل سوزان تميم

السياحة بخير و المصانع بخير و البنوك بخير و يمكن احسن من الاول كمان لان الامريكان لما لقوا البنوك بتعاتهم فلست كل واحد جاب الهاند باج بتاعته و سحب فلوسه و طار على مصر اللي لا تتأثر بالازمات

انا عارفة ان المصريين فهلوية و دهنوا الهوا دوكو و مش بس بيغزلوا برجل حمار لا دول كمان بياكلوا الحمار شخصيا و لا حاجة تهمنا و لا حاجة تهزنا لكن هل معقول عشان فتاكتنا دي مانتأثرش بالازمة زي بقيت دول العالم كلهم

مبنتأثرش ليه يا عالم هل احنا عالم رخمة و خلاص جتتنا نحست و الحكومة بتقولها لنا بطريقة شيك عشان ما تجرحش كرامتنا يعني بدل ما تقول يا شعب يا رخم يا سم ياللي مش بتحسوا عملنا فيكم كل حاجة و انتم ماسكين فيها و متبتين حتى الازمات المالية اللي دمرت اقتصاد دول كبيرة مش مأثر فيكوا يا عالم يا تلمة

فراحت بمنتهى الرقة و الوداعة قايلة احنا لا نتأثر بالاقتصاد العالمي و الاقتصاد عندنا راسخ رسوخ الجبال

و احنا اللي اثرنا على الازمة و الجريمة لا تفيد

يا ترى اين الحقيقة ؟؟؟؟؟؟؟؟؟؟

هذا ما سوف تشاهده في برنامج :

حديث الطحينة